Tanü Northeast Democratic Alliance senden amentsü

New Delhi, June 21 (Agencies) : Arunachal Pradesh, Nagaland, Assam nungi chief minister tem aser Northeast nungi yimten telok kar Bodbarnü Guwahati nung ajurutepa senden ka amentsü.
Northeast Democratic Alliance (NEDA) atema tatembang telemtetba agitsü nükjidong nung iba senden amentsü. Assam nung BJP sorkar mezüng tentetba anogo nung BJP president Amit Shah-i NEDA telok tentetba osang metetdakja liasü.
2017 nung Manipur aser Meghalaya nung election agitsü jakdang “Congress-free Northeast” kümdaktsütsü atema taruba ita Shah-i tawa Northeast nung BJP den yaritepba teloktem ayongzüka o jembitsü.
Bodbarnü BJP general secretary Ram Madhav menden ser senden ka amentsü aser iba nung Assam CM Sarbananda Sonowal, Nagaland CM T R Zeliang, Arunachal CM Kalikho Pul, NEDA convenor & BJP national executive züngsem Himanta Biswa Sarma aser National People’s Party (NPP) nungi Conrad Sangma nungertem adentsü.
Senden nungsa Assam nung BJP den yariteper- Asom Gana Parishad aser Bodoland People’s Front nungi lennirtem aser taoba Mizoram CM Zohram Thanga nungertem adentsü.
“2019 küm onoki Northeast nungi Lok Sabha menden 25 nungi 20 angutsü nükjidong lir. NEDA ya nübortemi junga agizükogo. Asüng informal meeting ka amentsü aser iba mapang külemi inyaka aotsü atema telemtetbatem agitsü” ta BJP osang ka ajanga metetdaktsü.