Tanü nungi 52nd ASA Wrestling Meet tenzüktsü

Kohima, Metsüremi/March 15 (TYO): Khuochiezie (Kohima Local Ground) nung March 16, 2024 nü nungi 52nd Angami Sports Association (ASA) Wrestling Meet 2024 tenzüktsü maparen ajak renemogo.

Iba asayamung nung Angami nunger wrestler 60 terenemshiba tulu nung lir, aser defending champion Kezhaseluo-o Pienyü-i tayongzüker balala ajangtsü renema lir.

Tsükong pezü nungi iba asayamung nung shilem agitsü aser yangji Northern Angami Sports Association (NASA) nungi reigning champion Kezhaseluo-o Pineyü, Southern Angami Sports Association (SASA) nungi Atuo Tevo, Western Angami Youth Organization (WAYO) nungi Seyiejalie Gwirie aser Chakhroma Youth Organisation (CYO) nungi Keneisetuo Kire nungertem dena lir.

WAYO wrestler temi SASA wrestler den melangteptsü aser NASA wrestler temi CYO wrestler den melangtepa iba asayamung tenzüktsü.

Kasa mapang SASA wrestlers temi CYO wrestlers den melangteptsü aser WAYO wrestlers temi SASA wrestlers tem den second round nung melangteptsü.

Third round nung NASA wrestler temi SASA wrestler den melangteptsü aser CYO wrestler temi WAYO wrestler den melangteptsü.

Iba asayamung nung wrestling sapur nisung 16,000 shi arua adentsü teimla lir.

Ground management maparen Angami Catholic Union nem nungloktsü aser organising committee convenor Neiba Bernard Pienyü-i anir anibelem mesasai iba asayamung takok ngua tembangtsü asoshi meranga inyaktar.

Iba asayamung nung Nagaland Chief Minister Neiphiu Rio ya tongti tesemdanger asütsü aser MLA Dr. Tseilhoutuo Rhütso ya tetushi tesemdanger alitsü.

Iba asayamung reprangtsü atema entry ticket yamai alitsü: Donors atema sen 2000, Balcony aser Chair A category atema sen 500, Chair B atema sen 200 aser Chair C atema sen 100 alitsü.

Kasa mapang ASA ajanga asayartem dang anepdang 8:30 ako nungbo iba tesem nung arua mena atatsü metetdaktsüogo.