Tanü nungi ‘Ao Kin Asentenshi’ sentong tenzüker

Mokokchung, Oct 31 (TYO): ‘Ao Kin Asentenshi’ sentong koba Nov 1 nungi tenzüka anogo asemnü yangi Imkongmeren Sports Complex Mokokchung nung ayongzüka lir, iba dak sentakba nung maparen tapu balala lemsar mazüngi inyaktepdagi.
Oct 23 nungi tenzüka anogo 6 tashi nung mungdang ki süzükogo. Mungdang kiji lenten nung feet 200 aser metong nung feet 360, sabang (platform)-ji 32/20 feet lir. Iba mungdang ki nung nisung tajemba agi meyi terbo mentettsü. Angazükba agi, iba mungdang ki ya Nagaland nung mungdang ki asüba rongnung tulutiba asütsü.
‘Ao Kin Asentenshi’ sentong ya Ao Baptist Arogo Mungdang (ABAM)-i ayongzüker. ABAM otsü nung iba ama Ao kin songjen atema asentenshi tulu agiba yabo ibai mezüngbuba aser otsüsütsü ka asütsü, ta angazüker.
Iba asentenshi yabo tila-tulu kecha mebendangi Tsüngrem tsüngdang ajemaluba aser Ao kin Tsüngrem dang temenen nangzüka tatok meshiba mapang ka südaktsütsü. Ano tajung kaji, iba asentenshi ya ‘denomination’ aser VIP mesüra Non VIP kecha tebendang melii Ao kin songjen atema kasasa asütsü, ta tayongertemi sangdongogo.
Anogo asemnü “Kibuba onok asentenshijang” omen nung ajemdaker agitsü aliba sentep balala nung Tsüngrem o jembirtemji; Rev. Maong, Rev. Imdangmeren, Rev. Lanuyanger, Rev. L. Kari Longchar aser Rev. Kilang Jamir par pungu jaoka lir. Ao kin tebilemtsü aser khuret-ji Aori dang metet nungji, Tsüngrem o jembirtemjia Aor dang jaok, ta osang ajanga angazüker.
Iba sentong ya Ao kin asoshi temelenshi tajung adokba mapang ka asütsü nüburtemi imlar aser iba asoshi Arogo balala den kija kibongtemi ayimsünga nünga sarasademba ola angashir. Iba sentong nung adeni arurtemi peisasa dang apokatsü, abensüoshi aser tayipdak anepalutsü.
Iba sentong nung Mokokchung district nungi dang masü, saka tanga district aser bendang balala nungi Ao senso nübur aika arua adentsü imladagi. Sentong nung Aor legislators-tem den bureaucrats-tema aika arutsü ta angazüker.
November 1 nüji iba asentenshi sentong akaba temaitsü Ao arogo ajak nung nikongdang 3:00 ako nung tsüngtsüng atemtsü. Nov 1 nü mezüng sentongji nikongdang 4:00 ako nungi tenzüktsü. Iba ama asentenshi tulu yabo aiben marutsü aser tang ya Ao kin den Tsüngremi jembiba mapang ka amai bilemer, anungji, Ao senso shirnokisa iba osang angashidir, ajaki iba temoatsü aser maongkaji agitsü merangang ta iba sentong ketdangsertemi metetdaktsü.
Koda masü marutetertemi kidang cable T.V mesüra social media; facebook, you tube ama nung sentep tagidak nung “live” sayutsü, anungji, “Ao Kin Asentenshi” ta type sür reprangtettsü.