Tanü nungi Assembly session tenzüker; Trust Vote agitsü

Speaker menden atema Vikho-o aser Imtiwapang na tokteptsü

Kohima, Metsüremi (March) 12 (TYO): Asüng nungi 13 buba Nagaland Legislative Assembly (NLA) indang mezüngbuba session tenzüktsü.
Iba session mezüngbuba ya kanga tongtipang lir House nung lennir tasen aser Chief Minister Neiphiu Rio-i pa ket nung nübo peria aliba sayutsü aser iba denji külemi NLA Speaker indang election agitsü aser 2018-19 Budget benoktsü.
Metsüremi (March) 6, 2018 nü chief minister tasen inyaktsü shimdang Governor PB Acharya-i Rio dang Metsüremi (March) 16 nü mesüra matongdang pa ket nung nübo peria aliba kuli sayutsü atema tetuyuba agütsü.
NLA Commissioner & Secretary, N Benjamin Newmai-i provisional programme sangdongba nung anogo 14 nü agitsü aliba session nung anogo 8 nü sodi alitsü aser MLA tasentemi tenangzükba agitsü shia lir.
Mezüng anogo nung Speaker shimtsü aser iba atema ruling aser opposition MLA tem tsüngda tokteptsü tenzükogo.
Treasury bench People’s Democratic Alliance (PDA) nung züngsem 34 lir aser parnokji NDPP, BJP, JD, NPP aser Independent MLA lir. Parnoki Speaker atema MLA Vikho-o Yhoshu tenüng agütsüogo aser külen opposition bench NPF (MLA 26)-i taoba speaker Dr Imtiwapang Aier tenüng benokogo.
Tanü anüngdang 12:00 ako tashi nung tenüng meyipa agitsü mapang latettsü aser iba mapang süitem tashi nung nomination 2 dang liasü. Ajisüaka, Speaker (Protem) Mmhonlumo Kikon-i tenüng meyipa agitsü asoshi tanü nikongdang 1:00 ako tashi mapang atsülangtsü aser ibaji ano taonung ayaterm tashi atsülangtsüogo, ta osang ka ajanga ashi.
Assembly mezüng anogo nung Speaker shimba sülen Trust Vote agitsü aser iba mapang Nagaland Chief Minister, Neiphiu Rio-i pa ket nung nübo peria aliba sayutsü.
Asüng Assembly session agiba sülen Metsüremi (March) 21 tashi sodi alitsü aser Metsüremi 22 nungi session agiyonga aotsü.
Assembly session nung reports & rules benokba den Comptroller Auditor General-i sorkar department balala dak sendakba report tem benoktsü.