Tanü nungi bank nung mapa inyakertemi lungkak aittsü

New Delhi, Monupii (May) 29 (Agencies): Linük nung sorkar meyong aser nija bank tem nung mapa inyakertemi Rasemnü (Bodbar) aser Yangtepnü (Brihostibar) anogotem lungkak aittsü.
November 2017 nungi parnok indang itasen meyipa merepranger ta parnoki ashir aser itasen reprangshimang ta takhangba agüja lungkak aittsü.
Lungkak aitba sentongji asüngnep 6:00 ako nungi tenzüktsü.
Indian Banks Association-i March 31, 2017 nung ajemdaker 2% tutsütsü atema shidang saka United Forum of Bank Unions (UBFU)-i ibaji magizüker aser lungkak aittsü telemtetba agi.
Indian Banks Association ya linük nung senotsü rejutem ketdangsüba tentet ka lir.
All India Bank Employees Association nung sorkar aser nija bank tem nung mapa inyaker lakh 10 dak tema züngsema lir aser parnoki Indian Banks Association-i shidangba onük magizük.
“Lungkak aittsüba osangji Indian Banks Association (IBA) nem sangoktsüogo, iba nung bank management aser Chief Labour Commissioner (Central), New Delhi dena lir” ta AIBEA general secretary CH Venkatachalam-i ashi.
Tesüiba küm ana-asem ka bank nung mapa inyakertemi tanga mapatem toktsür Jan-Dhan, demonetisation, Mudra aser Atal Pension Yojana amala sorkar scheme tem kanga meranga inyakogo, ta UBFU Convenor Devidas Tuljapurkar-ia ashi.
“NPA dak sendakba inyakyim ajanga bank temi takoksa ajur aser iba tebilemtsü ya bank nung inyakertemi khuret mabentsü” ta paisa ashi.
Monupii (May) 29, 2018 nü bank nung mapa inyakertemi Mumbai nung aliba State Bank of India kima nung lungkak aitba sentongtem ayongzüka agi.