Tanü nungi BSNL-i unlimited BB agütsür

Dimapur, September 08 (TYO): Telecom operator temi tariff plan dalang agütsüba den tokteptsü atema Bharat Sanchar Nigam Limited (BSNL)-i September 9, 2016 nü nungi tenzüka unlimited BB ‘Experience Unlimited BB 249’ agütsütsü.
Tanü General Manager, BSNL office, Dimapur nung osangbenertem den jembidang SSA, Dimapur, General Manager-i, “Customer temi September 9 nü nungi October 31, 2016 nü tashi promotional offer angutsü,” ta metetdaktsü.
Iba offer ji Broadband customer tasenpurtem atema asütsü, aser iba mapang nung installation charges magitsü.
General Manager-isa, “Iba plan kübok tamshirtemi mezüngbuba 1GB data amshidang 2mbps speed angutsü, iba sülen tanüngba ita piyong 1Mbps speed angutsü. Iba plan ya ita trok atema dang asütsü, iba sülen BSNL-i customer tem nem ita nung sen 499 agi BBG Combo ULD 499 plan agütsütsü,” ta metetdaktsü.
Iba plan küboksa Deobar anogo shia aonung 9:00 ako nungi anepdang 7:00 ako tashi unlimited free calls agutsür.
Iba scheme ajanga BSNL landline aser broadband service den landline ajungketttsütsü ta BSNL-i amanger. Osang tejangja www.bsnl.co.in nung angutsü.