Tanü nungi Dimapur nung Housing for All scheme tenzüker

April 17 nü Dimapur Municipal Council office nung workshop sentong nung CEO, DMC Atokhe Aye-i jembiba noksa angur.  

Dimapur, April 17 (TYO): Mongolbarnü nungi tenzüka Dimapur Municipal Council (DMC) office nung anepdang 10:00 ako nungi nikongdang 3:00 ako tashi Pradhan Mantra Awas Yojana kübok Housing for All scheme inyaktsü atema verification maparen tenzüktsü, ta ketdangser osang ka ajanga metetdaktsü.
Hombarnü DMC office nung Dimapur Municipal town kübok colony balala nungi Council GBs/Chairmen den Pradhan Mantra Awas Yojana kübok Housing for All scheme atema workshop ka alidang Department of Municipal Affairs-i iba osang metetdakja liasü.
Dimapur telongtet nung Department of Municipal Affairs (DMA) nem application 3,000 shi agütsüogo. Dimapur Municipal Council (DMC) kübok ward number 1 aser 2 nungi aruba application agütsürtem indang documents ji April 18-20 anogotem nung anepdang 10:00 ako nungi nikongdang 3:00 ako tashi DMC office nung reprangshitsü.
Ano tanüngba ward tem atemaji shilem balala lemsar reprangtsü.
Tanü senden nung DMA ketdangsertemi senden nung adenertem dang iba scheme indang maparen tatsü agi rateta metetdaktsüogo.
Senden nungsa Executive Engineer, DMC, Er. Badal Badra-i adenshia alirtem dang, solid waste segregation atema DMC-i ward wise committee tentettsü aser jana takong o tai na lemsar intoktsü atema Municipal-i ki shia nem angati dustbins anana agütsütsü, ta metetdaktsü.
Kasa senden nung Joint Director (HoD) DMA, Zanbemo, DMC Administrator, H. Atokhe Aye aser tanga ketdangsertema dena liasü.