Tanü nungi India-Africa Summit pezünü akatsü

New Delhi, October 25 (Agencies): Asüng, Hombar nungi tenzüka New Delhi nung anogo pezünü India-Africa Forum Summit akatsü aser iba senden nung Africa nung aliba state 54 nungi telokakpurtem adentsü.
Iba senden dak sentakba security atema helicopter ana amshitsü. Helicopter ka surveillance atema amshitsü aser ka contingency atema amshitsü. Helicopter anaji Indian Air Force (IAF)-i agütsütsü, ta tanü Joint Commissioner of Police (Security), T S Luthra-i ashi.
Ajisüaka helicopter camera mesüra nisung mamenba aerial devices mamshitsü.
Iba senden agiba tongti tesem, Indira Gandhi Stadium aser kanga tongtibang nisungtem senzüba lenmang reprangtsü atema control room balaka amenokogo, ta paisa ashi.
Iba tesem nung CCTV camera 200 shi inokogo aser ITO, Delhi Secretariat, Raj Ghat densema Central Delhi nung CCTV 300 inokogo, ta paisa ashi.
Sepai shilem pezü nungi shilem kabo anogo pezünü senden atema security mapa lemzükja lir. Iba senden ya Ato kilonser Narendra Modi-i lapoktsütsü.
Asüng nungi tenzüka anogo pezünü senden tenzüktsü lia tanü External Affairs Minister, Sushma Swaraj-i, Africa ya maongka tasen aika atema tesem ka lir aser Africa continent rongsenkettsüng jenjang aintsü atema India-i inyaktsü, ta shiogo.