Tanü nungi Kejriwal-i Punjab semdanger

New Delhi, July 02 (Agencies): Sangküm Punjab nung Assembly election agitsü lia asüng, Deobarnü nungi tenzüka AAP tongti lenir aser Delhi Chief Minister, Arvind Kejriwal-i anogo asemnü state semdangtsü, aser iba mapang nung pai party youth manifesto sayatsütsü aser lokti balala ajurutsü.
Tanü New Delhi nung AAP lenir kati, “Arvind Kejriwal-i anogo asemnü Punjab semdangba tenzüka pai  Amritsar mezüng semdangtsü,” ta metetdaktsü.
Golden Temple aser Durgiana temple nung pai akhüm agütsüba sülen nikongdang pai party youth manifesto sayatsütsü, ta paisa ashi. Ibaji party indang mezüngbuba manifesto asütsü.
AAP-isa aluyimertem, Dalits, tetsürtem aser lokti balala atema manifesto sayatsütsü.
Lanurtem, tesayurtem aser lokti balala den o lemtepba sülen renemba party youth manifesto jagi shisaliok, mapa aser temesepba mozü rehabilitation onüktem nung tongtibangsüa rangloker.
Tanabuba anogo nung Kejriwal-i Gurdaspur, Jalandhar aser Malerkotla semdangtsü aser item yimti nung pai industry lenirtem densema lokti balala ajurutsü. Tatemsabuba anogo nung pai Ludhiana aser Khanna na semdanga shishilembartem aser industry nung inyakertem ajurua onük balala nung o lemteptsü.
AAP-i Delhi election nung takok tulu anguba sülen maneni Punjab election nunga takok tulu angutsü nükjidong yur meranga inyakdar.