Tanü nungi Mariani-Mokokchung lenmang noktanger

Mariani, February 19 (TYO): Mariani nung aliba local units – All Assam Students’ Union (AASU), Jatiyatabadi Yuva Chatra Parishad (AJYCP) aser All Assam Tea Tribes’ Students Association (AATTSA) teloktemi Mariani-Mokokchung sector nung gari lenmang yanglutsü atema küm ka jungnüa Border Road Organisation (BRO) nem takhangba agüja arur.
Tesüiba küm ka tsüngda mulungtet teloktemi ketdangsertem ajungmesotsü atema lenmang noktanga lungkak aitba sentongtem ayongzüka agiogo saka tebang agi nangzükba dak alaka BRO-i mapa kecha meinyak.
BRO-i mapa meinyakba atema tejashi sayua mulungtet teloktemi Brihostibar nungi New Sonowal (Mariani anasa) nung aliba BRO office shibangtsüogo aser asüngnep (February 20, 2016) nungi mapang tatakzük melii lenmang noktangtsü sentong ayongzükogo.
Lenmang noktangba nung school-i aoertem aser tatidang agütsürtem, Fire Brigade, medical services, press tembo madener.
Iba onük asoshi telemtetba tajung ka magi tashi aser lenmang noktangba magien tashi Mariani-Mokokchung lenmang nung mesenzüi atatsü metetdaktsür, ta Border Peace Coordination Committee (Assam-Nagaland) Coordinator, Er. Temsu Wathi Ao-i sangdong ka nung metetdaktsü.