Tanü nungi Mizoram nung yi noktanger

Aizawl, March 31 (Agencies): Hombar nungi Mizoram nung yi mangutsü. MNF sorkari tarutsü pututem kümzüktsü aser Mizo loktiliba temerük kümdaktsütsü atema iba mapa inyaker ta State Excise & Narcotics Minister K. Beichhua-i ashi.
Mizo National Front (MNF) sorkari election magidang nangzükba ama taoba hopta Mizoram Liquor (Prohibition) Bill, 2019 agizük. Iba Bill yagi küm pezü atema Mizoram nung yi ayokba aser ajemba noktanger. Tenokdangbaji April 1, 2019 nungi tenzüktsü.
“Yi noktangba ajanga state sorkari küm shia sen crore 70 akoksatsü. Saka revenue akoksabaji meimchir taküm akoksaba aser timtemba dang nungi tajemba lir. Loktiliba tajangzük angutsü ta asüba jiang tongtipangba” ta Beichhu-i osangbener dang ashi.
MNF sorkari defence personnel aser medical tsütsü nüngdakertem dak alia state nung yi yangluba, bener aruba, ayokba aser ajemba ajak noktanger, ta paisa shisem.
“Yi ajemba defence personnel nem licence balaka agütsütsü. Temang atema ajemer nem-a doctor nungi kuli ka mali nungbo mejemdaktsütsü” ta Beichhua-isa metetdaktsü.
State sorkari domestic aser foreign tourists nem yi jemdaktsütsü asü masü’ar ano telemtetba magi lir.
Election Commission-i Mizoram sorkar dang May 27 tashi nung Lok Sabha elections maparen metembang tashi Liquor Prohibition Act ozüng magütsütsü atema shiogo.
EC-i ashiba osangji state Excise & Narcotics Department nem sangoktsüogo, ta Mizoram Chief Electoral Officer (CEO) Ashish Kundra-i ashi.
Election Commission dang nungi osang tejangja metetnüa asüngdangogo aser telangzüba anguba sülen ang telemtetba ka agitsü, ta State Excise & Narcotics Minister Beichhua-ia metetdaktsü.
Mizoram ya küm 18 shi ka ‘dry state’ liasü saka 2015 küm Congress sorkari yi ayokba aser ajemba tenokdangba salatsü.
Yi tenokdangba agienba sülen lanurtem teimba sür nisung aika yi ajemba ajanga aser ano gari lendong balala nung taküm sama, ta Beichhua-i ashi.
Yaküm Congress-i Assembly elections nung takok mangubaji yi tenokdangba salatsüba atema liasü ta yimtenren asayameyanger kari ashir.
Yi ajanga nisung takümtem samaba atema public aser Arogo teloktemi yi noktangtsü takhangba agütsü saka Congress-i magizük, ta political analyst aser kaket zülur R.L. Sailo-i osangbener dang ashi.
Yi nokdangtsü melena taoba Congress sorkari ashiba agi iba ajanga revenue angur aser yi tamajung shibelenba den Myanmar o tanga northeast state tem nungi yi shibelenba inyakyim noktanger.
Yaküm assembly elections nung MNF-i inyaktsü ta nangzükba rongnung yi noktangtsüba ya tongti onük ka liasü aser iba ajanga parnoki assembly menden 40 nungi 26 nung takok angu.
2011 census ajanga Mizoram indang nütsüng yongsükji 1,091,014 lir. Iba nungi 87% ji Khristan tamangertem lir.