Tanü nungi Nagaland Budget session tenzüktsü; Citizenship Bill anema telemtetba agitsü

Kohima, February 20 (TYO): Brihostibar nungi Assembly Hall nung Nagaland Legislative Assembly indang budget session tenzüktsü.
Iba session ya tongtipang lir kechiyong financial year 2019-2020 atema budget ajunga benoka agizükba dang masü saka ashishitep aketba Citizenship Amendment Bill (CAB) 2016 atema assembly-i bangzüng ka renemtsü.
CAB 2016 ya Lok Sabha nung agizüka liasü aser Nagaland sorkari February 23, 2019 nü iba anema telemtetba ka agitsü.
February 25 nü Chief Minister Neiphiu Rio-i budget benoktsü. Rio-i finance portfolio bena lir.
Brihostibarnü Nagaland Governor P B Acharya-i o jembiba sülen assembly session tenzüktsü.
Züngsem 60 agi akümba assembly nung Peoples’ Democratic Alliance (PDA) sorkar kübok MLA 33 lir. Parnokji NDPP MLA 17, BJP 12, NPP 2, JD(U) aser Independent MLA ka ka.
Külen, Opposition Naga Peoples’ Front nung züngsem 26 lir. Yaküm September ita NDPP MLA Imtikumzuk ajungbena asüba ajanga menden ka tazüng lir.
Iba session nungsa sorkar department temi annual administrative reports 2018-19 metetdaktsütsü aser year 2018-19 atema sorkari supplementary demands for grants benoktsü. NLA Budget session ya February 26 nü tembangtsü.