Tanü nungi NE state tem nungi Speaker tem senden tenzüker

Agartala (Tripura), May 30 (Agencies): Mongolbarnü nungi tenzüka Agartala nung Northeast India Assembly Speaker tem anogo ana senden amentsü, aser iba senden nung parliamentary democracy tashi itshitsü atema o lemtepba den külemi Lok Sabha aser Rajya Sabha presiding officer tem aser legislative body tem tsüngda shisa lemsateptsü.
Hombarnü Agartala nung osangbenertem den jembidang Tripura assembly Deputy Speaker, Pabitra Kar-i, “Iba senden ajanga parliamentary democracy tashi itshitsü aser Lok Sabha, Rajya Sabha presiding officer tem aser Northeast legislative body tem tsüngda shisa lemsateptsü atema maongka angutsü,” ta metetdaktsü.
“Hombarnü Lok Sabha Speaker, Sumitra Mahajan Tripura tonga aruogo, aser Mongolbarnü lai NE state ti nungi Assembly Speaker tem aser Deputy Speaker tem senden, North-east Region Commonwealth Parliamentary Association (NERCPA) lapoktsütsü,” ta Kar-isa ashi.
“Iba senden ajanga presiding officers aser assembly züngsemtemi nüburtem atema senden tajungba katettsü. Tang tasen shimba assembly züngsemtemia assembly telung aser tema naprong nung shilem tajungba agitettsü,” ta paisa shisem.
Iba senden nung Lok Sabha Deputy Speaker aser All India Anna Dravida Munnetra Kazhagam lenir, M. Thambidurai, Rajya Sabha Deputy Chairman, P.J. Kurien aser Lok Sabha Secretary General, Anoop Mishra nungera adentsü.
Tang NERCPA nung mendenbubaji Meghalaya assembly Speaker, Abu Taher Mondal lir.
Iba senden nung Assam dak alaka tanüngba NE state ajak nungi speaker aser deputy speaker ajak adentsü. Tang sorkar tasen akumba state Assam nungbo speaker aser deputy speaker ano meshim.
Kar-i ashiba agi, iba senden nungsa NE tesem nung tenem lima nung tongtibang onük, ‘soil erosion’ indanga lemteptsü.
Tripura assembly Speaker, Ramendra Chandra Debnath-i ashiba agi, 78buba All India Presiding Officers’ senden alidang state tulutem nung küm ka nung assembly senden anogo 100 amentsüla aser NE state ti densema state tilatem nung tajemba agi anogo 60 senden amentsüla.
Ajisüaka NE state aika nung küm nung assembly senden anogo 20 nungi 25 tashi dang amener.