Tanü nungi NLA budget senden tenzüker

Kohima, Tsüklai/February 06 (TYO): Hokolbar nungi tenzüka 2020-21 kümsük atema anogo 8 nü Nagaland Legislative Assembly (NLA) budget senden tenzüktsü, ta ketdangsertem osang ka ajanga metetdaktsü.
SC/ST atema assembly menden shiteta yutsüba dak sendakba nung Constitution 126th Amendment Bill, 2019 agizüka January 17 nü NLA Speaker-i senden thinenba sülen anogo 20 lir sülan iba senden tanaben tenzüker.
Iba senden ajanga temaitsü ka sayur, kechiyong House nung opposition- Naga People’s Front (NPF)-i Citizenship Amendment Act anema bangzüng benoktsü atema mapang meshia liasü.
Iba dak sendakba nung state nung kaketshir tongti tentet, Naga Students’ Federation leniba nung state nung CAA anema longkak aita sorkar dang Citizenship ozüng agientsü atema bangzüng ka renema agizüktsü asüngdangogo.
Iba senden ya February 14 nü tembangtsü aser Honibarnü rongdak onük ka ama CAA onük benoka o lemteptsüa akok.
Tang NLA Speaker menden tazüng lir, aser iba atemaji Hokolbarnü election agitsüa akok. Ruling Peoples’ Democratic Alliance (PDA)-i iba menden atema tang deputy speaker teinyakdak, Sharingain Longkumer shimogo aser pai anaben tashi NPF MLA aser taoba mapang speaker Dr Imtiwapang Aier den tokteptsü.
NLA senden nungsa January 17 nü Nagaland Angh-i jembiba onük dak sendakba nung ‘Motion of Thanks’ o tokteptsü aser finance portfolio repsema abensang Chief Minister, Neiphiu Rio-i senden tembangtsü anogo ka lia Budget 2020-21 benoktsü aser February 14 nü o lemtepba sülen agizüktsü.