Tanü nungi Parliament Monsoon Session tenzüker; Congress-i bill tem menokdangtsü nangzük

New Delhi, July 17 (Agencies) : Parliament nung Monsoon Session tenzüktsü anogo ka lia, Deobarnü Congress-i junger ta asüba bill tem menokdangtsü ta metetdaktsüogo, ajisüaka, parnoki Arunachal Pradesh nung yimten ken o aser India-i NSG membership mengutetba indang onüktem benoktsü imlar.
Hokolbarnü Finance Minister Arun Jaitely aser Parliamentary Affairs Minister Ananth Kumar nati Congress lennirtem – Ghulam Nabi Azad aser Anand Sharma na den ajurutepa GST bill nung obang meputep aliba onüktem angatetteptsü merangogo.
“Onoki NSG aser tzümetsüngtem indang onüktem atema olemtepnür. Onoki bill ka danga menokdangtsü saka junger ta asüba bill dang agizükdaktsütsü” ta Ghulam Nabi Azad-i ashi.
Hombar nungi Monsoon Session tenzüktsü lia tanü party ajak külem senden ka jatepa amendang opposition telok aika nungi lennirtemi Arunachal Pradesh aser Uttarakhand nung yimten mepetmesü adokba onüktem benoka jembiogo aser iba ya ajanga parnoki sorkar dang tasüngdangba aika alitsü ama ajiteter.
Rajya Sabha nung Opposition lennir Ghulam Nabi Azad-i tanü senden nung, “state temi joko BJP-i aniba Centre sorkar dak temulung malemer” ta ashi.
Tanü Prime Minister Narendra Modi-i senden nung yimtenren telok ajaki Kashmir dak sendakba nung ola ka dang adokba atema pelaba metetdaktsü aser paisa GST bill agizüktsü atema yariteptsü mepishi.