Tanü nungi Parliament senden tenzüker

New Delhi, Nov. 25 (Agencies): Bodhbar nü asükwa Parliament senden tenzüktsü aser iba senden nung opposition party temi linük nung akümtsübutep maliba onük benoka ibaji aitsütsü atema pangzüng ka akhangba ajanga rongrong adoktsü südi, ta bilemer.
Tan senden nung sorkari Goods & Services Tax Bill densema tongtibang Bill aika benoka agizüktsü nükjidong yur tanü sorkari all party senden ayongzüka akadang Ato kilonser, Narendra Modi-i opposition party tem dang sorkari nüburtemi imlaba ataloktsütsü asoshi Parliament senden tangatetba tajung nung kadaktsüner, ta mepishiogo.
GST Bill atema constitution amendment bill Lok Sabha nungbo agizükogo saka Rajya Sabha nung NDA sorkar majority maliba ajanga iba bill anendaka lir.
Ano Parliamentary affairs minister, M Venkaiah Naidu-ia, “Akhümtsübutep maliba ta ajaba onük ya state tem kübok dang süaka iba onük densema onük ajak jembitsü sorkari melunga dang lir,” ta shiogo.
“Tawa Dadri nung atalokba aser MM Kalburgi tepsetba densema tia maka tatalokbatem indang opposition temi tebilemtsü akabaji sorkari meteta dang lir. Sorkari item tatalokbatem aitsüogo, kechiyong itemji sobaliba aser akhümtsübutep anema lir,” ta paisa ashi.
Tanü Bangaluru nung Congress tatong Tir Rahul Gandhi-i, “Onoki akhümtsübutep maliba onük benoktsü. Tang linük nung atalokbatem ya shisabulutsüka aser Ato kilonseri ola madoker,” ta shiogo.
Ano CPM general secretary, Sitaram Yechury-ia, Rajya Sabha nung item tatalokbatem aitsüba pangzüng ka renemtsü aser tarutsü nungbo item ama tatalokbatem malitsü sorkar dang nungi telangzüba meshitsü benokogo, ta ashi.
Tan Parlaiment senden ya November 26 nungi December 23, 2015 tashi akatsü.