Tanü nungi PDA sorkar indang budget session agitsü

Kohima, Metsüremi (March) 21 (TYO): Nagaland nung People’s Democratic Alliance (PDA) sorkar kümteter mezüng budget session tenzükba sülen hopta ka shi sodi agir asüng nungi session tenzüktsü.
Metsüremi (March) 8, 2018 nü Nagaland nung sorkar tasen kümtetba sülen Governor P B Acharya-i Chief Minister Neiphiu Rio dang Metsüremi 16 tashi nung pa ket nung nübo peria lir ta sayutsü atema anogo latettsü.
Ajisüaka, Rio-i budget session tenzükba mezüng anogo (March 13) nü MLA 33 pa ket nung aliba kuli agüja liasü. MAL 33 rongnung NDPP nungi 18, BJP nungi 12, NPP 2, JD(U) ka aser Independent MLA ka dena lir.
Assembly session mezüng anogo nung Speaker indang election agi aser iba nung PDA züngsem Vikho-o Yhoshü-i takok angu. Iba sülen anogo 8 nü atema sodi agitsü telemtetba agi.
Asüng nungi session tenzüka agidang Governor-i o jembitsü aser Metsüremi (March) 23 nü Chief Minister Rio-i 2018-19 Budget benoktsü ta Assembly osang ka ajanga ashi. Rio-i Finance portfolio bena lir.
Session nungsa reports aser rules balala benokba den Comptroller Auditor General-i sorkar department balala indang report tem metetdaktsütsü.