Tanü nungi PM Flagship Scheme kübok Online Applications tenzüker

New Delhi, November 02 (Agencies): Brihostibar nungi tenzüka Pradhan Mantri Awas Yojana (Urban) scheme kübok jenjang dalang agi ki atema online applications tenzüktsü, aser iba ya Modi sorkar flagship scheme kübok nisung aika anir arutsü nükjidong nung lir.
Bodhbarnü Housing & Urban Poverty Alleviation (HUPA) Ministry aser Ministry of Electronics & Information Technology indang Common Services Centre e-Governance Services India Ltd (CSC) na tsüngda Memorandum of Understanding (MoU) tezüngzüktep ka agiogo, iba tezüngzüktepji Union Minister tem- M Venkaiah Naidu aser Ravi Shankar Prasad nati kuli süa agi.
“Iba mapatong ya sorkar indang service balala nung tetsüngda malitsü mesüra tom nung mesamai nüburtem atongtsü atema lir,” ta Naidu-isa metetdaktsü.
Paisa, direct online application agütsüba ajanga tim ketdangsertemi agizüka tekaratiba nung tajangzük angutsüpurtem indang inyaktsütsü.
Iba service ya Brihostibarnü nungi tenzüka jila/yimtitem nung CSCs 60,000 nungi angutsü aser application shia sen 25 asütsü.
Digital India Mission ajanga linük nung temelenshi tulu kadaktsür ta shia Naidu-i, “Iba mapatong ajanga jila nung sensakertemi teyari aser nüngdaktem atema Urban Local Bodies ajurutsü timtem magi online ajanga teyari anguba agi jila aser yimtitem nung sensaker aika PMAY (Urban) küboki aittsü,” ta ashi.
Pai ashiba agi, iba mapatong ajanga tetsükdaktsütem majurutsü aser kari nüburtem tim tangutsü atema sendokra, iba system agi iba asoshiji inyaktsü.
Naidu-isa, 2005 nungi 2014 kümtem nung jila nung sensaker lakh 13.70 nem jenjang dalang agi ki agütsüogo aser taoba küm ka tsüngda jila nung sensakertem atema ki lakh 11 agütsüogo aser tang online applications mapatong tenzükba ajanga iba kübok aikati tajangzük ngutettsü, ta metetdaktsü.
Prasad-ia, Digital Mission India nung CSCs ya sepaitem mesüka lir aser iba CSCs-i  online delivery services agütsüba ajanga lokti nung telemsa balala nem tashi agütsür, ta ashi.
Tanü iba MoU nung Ministry of HUPA Joint Secretary, Amrit Abhijat aser CSC e-Governance Services India Ltd CEO, Dinesh Tyagi nati sign asü.