Tanü nungi Ram Nath Kovind-i linük sema senzütsü

Lucknow, June 24 (Agencies): NDA-i shimba linük Tir candidate, Ram Nath Kovind-i Deobarnü Uttar Pradesh state nungi Rajya Sabha aser Lok Sabha naprong nungi MP tem ajurua nüboyimtsü, iba sülen linük nung tanga tesemtem sema nüboyimtsü.
July 17 nü Tir election agitsü aser iba election nung electoral college züngsemtemi vote agütsütsü. Electoral college nung Lok Sabha, Rajya Sabha, state tem, Union territory tem aser Delhi NCT region nungi tatartem lir.
Kovind-i UP nung MP tem, BJP MLA tem, BJP den teloktep party balala nungi lenirtem aser tanga party nungi lenirtem ajurutsü. Iba sülen pai Uttarakhand semdanga lenirtem ajurutsü, ta UP assembly osang ka ajanga metetdaktsü.
NDA-i shimba candidate Kovind ya UP state kübok Kanpur Dehat district nungi lir, aser iba dak sendakba nung state Chief Minister, Yogi Adityanath-i, Uttar Pradesh nungi jabaso ka Tir menden nung amentsü, aser iba ya akhümket ka lir, ta ashi.
Kovind ya tamalen Uttar Pradesh BJP unit nung inyaka liasü, aser state nung Laxmikant Bajpai BJP Tir inyakba mapang nung pa general secretary shima liasü.
Centre nung Narendra Modi-i aniba sorkar tashii aruba sülen pa Bihar Angh shima liasü, aser tang tesüsa pa Tir election atema candidate shimogo.