Tanü nungi Reliance Jio indang 4G service ajak angutsü Reliance Jio customer ajaki voice call angati angutsü

New Delhi, September 04 (Agencies): India linük tesem ajaklen Hombarnü nungi tenzüka Reliance Jio service ajak angutsü, kechiyong subscriber million 100 angutsü nükjidong nung company-i 4G-enabled handset alir ajak nem iba lenmang lapoktsüogo.
Telecom company tem- Bharti Airtel, Idea Cellular aser Reliance Communications Brihostibarnü share shilem 9 tashi ajema alua liasü, kechiyong parnok den tokteper, Reliance Jio-i parnok indang data tariff GB 1 nung sen 50 tashi aluogo.
Tang market nung temaba jenjang nung aliba telecom company- Bharti Airtel atema osang tamajung kaji- tanü Reliance AGM, Mukesh Ambani-i, “Reliance Jio-i active user nem angati voice services agütsütsü aser roaming charge malitsü,” ta sangdongogo.
“Reliance Jio-i 2017 March ita tashi nung India nütsüng shilem 90 ayimjemtsü nükjidong lir. Company-isa Rs 2,999 tashi nung 4G handsets sayatsü sentong lir,” ta Ambani-isa metetdaktsü.
Tang tashi nung Jio indang network ajanga yimti 18,000 aser yimtsüng lakh 2 ayimjemdar, ta paisa shisem.
Osang ajanga ashiba agi, Jio SIM ya Reliance Digital stores nung dang ngua liasü, ajisüaka tang nungibo multi-brand outlets aser mobile phone dokantem nunga angutsü.
“(Jio) SIM ji linük nung store lakh 2 jungnüa nung angutsü,” ta osang ka ajanga ashi.
Ano iPhone, Xiaomi, Motorola aser Lenovo amshirtemi taliba ajangzüktsü.
RJio-i tetendangba mapang subscriber million 1.5 atsür arutetogo, aser maneni akokba tashi mapang tatsütiba nung subscriber million 100 atsür arutsü nükjidong lir.
Preview offer kübok Sony, Sansui, Videocon, LG, Samsung, Micromax, Panasonic, Asus, TCL, Alcatel, HTC, Intex, Vivo, Gionee, Karbonn aser Lava densema brand 20 nem anogo 90 tashi angati unlimited calls aser item brand 4G smartphone amshirtem nem high-speed mobile broadband agüja liasü.
Iba brand ya tangbo ‘welcome offer’ ta melenogo, koba ajanga September 5 nungi December 31, 2017 nü tashi unlimited services agütsütsü, iba sülen tamshirtem nem voice calls – local aser STD naprong den taküm piyong angati roaming agütsütsü nangzüka lir.
Tang market nung data GB ka nung sen 250 lir, iba denji medemdangra RJio data charges GB ka nung sen 50 dang asütsü sangdongogo.
Iba SIM ya tangbo eKYC ajanga melamela angutsü, anungji consumer temi form fill up süa mapang talangka atatsü menüngdaker.
“SIM agizükdang consumer temi plans – pre-paid mesüra postpaid shimtsüla- aser parnoki December 31, 2017 nü tashi angati services angutsü,” ta osang ka ajanga ashi.
Company-i tariff plan 10 sangdongogo, ibaji khenkhen dang amshirtem atema anogo ka asoshi sen 19 plan nungi tenzüker data aika amshir atema sen 4,999 plan tashi lir.
Reliance-isa December 31, 2017 tashi amshir Jio customer tem nem sen 15,000 jenjang Jio apps bouquet kaka agütsütsü.
Sen 19 prepaid plan kübok tamshirtemi unlimited free voice call den 100 MB data aser anogoshia SMS 100 angutsü. Sen 149 plan ji prepaid aser postpaid amshir napronglai angutsü aser iba nungji ita ka validity nung 300 MB data aser SMS 100 angutsü.
Sen 4,999 plan kübok tamshirtemi 4G data 75GB den aonung unlimited 4G angutsü.
Tanga plan temji sen 129 (prepaid), sen 299 (prepaid), sen 499, sen 999, sen 1,499, sen 2,499, aser sen 3,999 lir.