Tanü nungi SC-i Arrla 370 dak sendakba ken otem angadangtsü

New Delhi, September 30 (Agencies): Centre-i Jammu & Kashmir nung Arrla 370 agienba aser linük temzüng den ibaji sendaktepa aliba onüktem anema benokba ken otem angadangtsü atema Hombarnü Supreme Court-i Constitution bench ka nem agütsüogo, aser item ken o ya Mongolbar nungi tenzüka angadangtsü.
Chief Justice Ranjan Gogoi-i bench nem agütsüba ken otem rongnung Kashmir nung osangbenertem nokdangba aser tanurtem ozüng alema pua ayuba densema lir.
Judge pongui akümba Constitution bench nung lenirji Justice N V Ramana lir aser tangartemji justices- S K Kaul, R Subhash Reddy, B R Gavai aser Surya Kant nunger lir.
Jammu & Kashmir nung Arrla 370 agientsü aser Union Territory ana küma lemdangtsü atema Centre-i telemtetba agiba anema temepishiba ken o aika benoka lir.
Ken o agütsür rongnung National Conference, Sajjad Lone-i aniba JK Peoples Conference aser advocate M L Sharma nunger densema nija aikati ken o benoka lir.
National Conference temepishiba ken oji Lok Sabha MPs- Mohammad Akbar Lone aser Justice (retd) Hasnain Masoodi nati benok.
Lone ya taoba mapang J&K assembly nung Speaker liasü aser justice Masoodi ya Jammu & Kashmir high court nung retired judge ka lir.
Iba dak alia taoba mapang defence officers aser bureaucrat temia ken o ka benoka lir. Parnoki ashiba agi, August 5 nü linük Tir tetuyubaji ozüng alema lir aser magila.
Ano yimtenren lenir Shah Faesal aser taoba mapang Jawaharlal Nehru University Students’ Union (JNUSU) nung lenir, Shehla Rashid natia Arrla 370 agienba dak sendakba ken o ka benoka lir.