Tanü nungi sorkar tesayur 21000 longkak aittsü

Kohima, May 23 (TYO) : Nagaland nung sorkar tesayurtem meyirijang metsürka dak tali Mongolbar nü nungi longkak aita ‘mass casual leave’ agitsü lemtetogo. Item tesayurtem jagi Higher Secondary Education nungi Secondary aser Elementary Schools piladaktsünüa takangba agütsüba onük nung sorkari telangzüba tajung magütsüba agi mepelaba sayua iba longkak ait sentong tenzüker.
Item tesayurtemji sorkar school 2069 nungi lir aser iba longkak aitba sentong ya All Nagaland School Teachers’ Association (ANSTA) aser Nagaland Secondary Schools Field Officers’ Forum (NSSFOF) nati ayongzüker. Iba longkak aitba sentong ya May 24 nungi 26 tashi anogo asem nü agitsü ta ANSTA tir, Wb.Ponchulo Wanth-i yangi tanü nikongdang osangbenertem den jembidang metetdaktsü.
Tang ya school tanurtem tatidang agiba mapang lir, iba asoshi kanga sasaa bilemer, ajisüaka sorkari telangzüba kecha magütsüba agi parnok longkak aittsüsa akümer ta ANSTA aser NSSFOF lenirtemi metetdaktsü.
Iba sülena sorkari telangzüba shitak magütsüra ano June 1, 2016 nü nungibo mapai moi longkak aita amongtsü ta parnokisa metetdaktsüogo.