Tanü nungi tenzüka anogo asemnü Indian Navy senden amentsü

New Delhi, Monupii/May 07 (Agencies): Sangtennü (Mongolbar) nungi tenzüka anogo asemnü Indian navy conclave amentsü, aser iba senden nung Indian Navy nung tongti commander temi raratsü atema renema aliba jenjang reprangshitsü aser Indian Ocean nung China nunger sepaitem tali bulua amenokba anema inyaktsü asoshi o lemteptsü.
Iba senden nungsa Indian navy indang mission nung ajemdaker Indian Ocean Region nung sepaitem ayutsü, defence budget nung lemzüktsüba senotsü shisa kaa amshitsü aser modernisation onüktem jembitsü. Senden nungsa raraba sepaitem nungittsü atema mitkartem tali agutsüsemtsü, artificial intelligence amshitsü aser technology tasen amshitsü onüktem nung o lemteptsü, ta Indian navy-i sangdong ka nung metetdaktsü.
Indian Ocean region nung China nunger navy tem inyaksangshi tali akumba ajanga India nungeri amokmeren tayongzükba ka ajuruba mapang ka nung iba senden amentsü. China nungeri southeren Pakistan kübok Gwadar nunga deep-sea port ka amenokogo aser Horn of Africa kübok Djibouti nunga naval base ka amenokogo.
Iba dak alia China nunger navy rongtemi Indian Ocean nung anti-piracy operations agidar. Iba dak sendakba nung India nunger navy-i Indian Ocean region aser Southeast Asia nung aliba linüktem den tongtepratepa jembishinüa inyakdar.