Tanü nungi tenzüka Ato kilonser Modi-i linük 4 semdangtsü

New Delhi, May 28 (Agencies): Deobarnü Ato kilonser, Narendra Modi-i, asüng nungi tenzüka pai linük pezü- Germany, Spain, Russia aser France semdangtsü, aser ibaji India nunger rongsenkettsüng ajungkettsütsü nükjidong nung aser item linüktem dang India nung sen invest asütsü asüngdangtsü nükjidong nung lir, ta metetdaktsü.
Pai anogo trok agia linük pezü semdangtsü. Pai Germany tama semdanga Chancellor, Angela Merkel den India-Germany Intergovernmental Consultations (IGC) framework kübok onüktem jembitsü.
Paisa Germany Tir, Frank-Walter Steinmeier-a ajurua senden amentsü.
Modi-i ashiba agi, Merkel tenati shishilembaba aser investment, security aser kiralongra anema raraba, science & technology, skill development, yimtitem nung terenlok, railways aser civil aviation, clean energy, terenlok, anema alibaren aser alternative medicine nung linük ana amalitepa inyaktsü atema jembitsü.
Germany ya partner tajung ka lir, ta shia Modi-i, “India melenshitsü atema kü nükjidongji Germany den tapet asütsü,” ta ashi.
Germany yimtiba, Berlin nung Modi aser Merkel nati linük anaprong nungi business lenirtem den senden mena shishilembaba aser investment nung linük ana tesendaktep tashi itshitsü atema jembitsü.
Iba sülen Mongolbarnü Modi-i Spain semdangtsü, aser ibaji küm 30 shi nung tang mezüng India Ato kilonser kati iba linük semdanger asütsü.
Pai Spain nung King Felipe VI ajurutsü aser Tir, Mariano Rajoy den senden mena ken o balala jembitsü.
“Linük ana tesendaktep tajungba akumtsü atema onoki o lemteptsü,” ta Modi-i ashi.
Paisa, “Onoki Spain nunger industry nem India nunger project balala- infrastructure, smart cities, digital economy, renewable energy, defence aser tourism nung shilem agia invest südaktsüner,” ta ashi.
Iba sülen May 31 nü Modi Russia-i oa St. Petersburg nung June 2 nü tashi 18buba India-Russia Annual Summit nung adentsü.
“Yaküm October ita Goa nung senden (India-Russia senden) amendang lemtetbatem maneni inyaktsü atema ni Tir Putin (Russia) den o lemteptsü,” ta paisa ashi.
Modi aser Putin natisa linük anaprong nungi CEO tem dena shisa lemsateptsü.
June 2 nü Modi aser Putin nati St. Petersburg International Economic Forum (SPIEF) nunga o jembitsü.
Tatemsa Modi-i June 2 aser 3 nü France semdangtsü, aser tang tasen shimba France Tir, Emmanuel Macron den senden amentsü.
“France ya asenok atema kanga tongtibang Strategic Partner ka lir. Ni Tir, Macron ajurua linük anapronglai jangraba onüktem nung jembitsü yongyaa atar,” ta Modi-i ashi.
“Ni France Tir den UN Security Council reforms aser India-i UN Security Council nung permanent züngsem akümtsü benokba, multilateral export control regimes balala nung India züngsem akümtsü, kiralongra anema amalitepa raraba, alima tsüngsang-mopung melenshiba aser International Solar Alliance densema alima onüktem nung o lemteptsü,” ta Ato kilonserisa metetdaktsü.
India nunger atema investment partner jenjang 9buba nung France linük lir aser India’er defence, space, nuclear, renewable energy, urban development aser railways nung France ya kanga tongtibang partner ka lir.