Tanü nungi tenzüka Pro Wrestling League asayatsü

New Delhi, December 09 (Agencies): Asüng, Brehostibar nü nungi tenzüka New Delhi kübok Indira Gandhi Indoor Stadium nung Pro Wrestling League (PWL) asayamong asayatsü renema lir.
Alima ajunga nung temaba jenjang nung alir toktepa melangtepertemi shilem agitsü renemba asayamong tenzükba küm, taküm 2016 küm telok 6 tashi shilem agitsü renemogo.
Dilli Veers, Haryana Hammers, Punjab Royals, Uttar Pradesh Warriors, Bengaluru Yodhas aser Mumbai Garuda nunger densemba telok 6-i tan asayamong nung shilem agitsü renema lir.
Temaba jenjang anguba telok nem senpet sen crore 3 agütsütsü renemba densema, tan asayamong nung takok angurtem nem ajak agi senpet sen crore 15 tashi agütsütsü renemogo.
Delhi Veers aser Punjab Royals telok na tsüngda tetenzükba asaya asüng toktepa asayasü lemzüka lir.
Mumbai telokia Warriors telok den tan Hokolbar nü asayatsü aser Haryana teloki Bengaluru telok den tan Honibar nü ajuruteptsü.
“PWL asayamong nung shilem agiba ya India nunger melangtepertemi Rio Olympics 2016 atema terenemshiba agir asütsü,” ta Haryana Hammers telok nung züngsemsang, Olympic bronze medallist, Yogeshwar Dutt-ia tanü metetdaktsüogo.