Tanü nungi ‘Vigilance Awareness Week’ amonger

Kohima, Oct.25 (TYO): Linük ajaklen küm shia ‘Vigilance Awareness Week’ amonger. Tetezü, sorkar inyakyim nung ochimashi mapatem anema mita alitsü asoshi tangatetba agüja ajungshitepba hoptaji ibai lir. Taküm küma iba hopta ya October 26 nungi tenzüka 31 nü tashiji amongtsü.
Iba kasa anogo ya Nagaland nunga amongba asoshi pelaba osang ka metetdaktsü dang, iba hopta amongba nükjidong ya sorkar inyakyim nung shitak aser ochishia inyaktsü asoshi ajungshiteptsü asoshi lir ta Nagaland angh, P.B.Acharya-i metetdaktsü.
Ochishia shitak yimsüsüba nung inyakyim shitak yur inyakdaktsüba agi telemtetba shitak agiba aser telemtetba agirtem nem khuret agütsüba mapatem dena lir. Aji oda, junga yimsüsüba nung nübortem tashi itta kümdaktsüba, shilem agidaktsüba aser ochishia inyakdaktsübatem dena lir. Iba nungji nübortemi metetnüba metettsü, temzüng ozüng shitak benshitsü aser nübortem meyong senotsü shitak amshiba ajanga nübortem libaliro jenjang tajungba kümdaktsübaji asütsü ta angh-isa metetdaktsü.
Taküm küm iba hopta omen “Jelia kümdangdaktsübaji junga yimsüsütsü asoshi amshiba hadir ka amai lir,” ta asüba nung jembidang, department shia office ajak nung ochimashi mapatem inyak metenzükdangyongi nokdangtsü atema inyakyim tenzüktsü akok, aser ibaji ajanga office inyakyim nung kongsa ochimashi inyaktsüsa reprangtetter, itemji metongshitsü asoshi lenmang bushiteptsü, ta paisa ashi.
Kasa hopta mong amongba asoshi State Vigilance Commission den pelaba osang ka lemsatep dang, Nagaland chief minister, T.R.Zeliangi ashiba agi, junga yimsüsüba tetezüji telemtetba shitak agitetba aser ibaji mapa küma kanga junga inyaktetba asütsü.
Junga yimsüsüba ajanga nübortem asoshi senotsü lemzüktsüba shitak amshir aser nübortem tajangzük shitak angur, anungji jelia ochishia inyaktsü kümdangshitaktsüba ajanga sorkar inyakyim nung ochimashi ajemdaktsür ta Chief ministeri iba küm omen indang jembidang metetdaktsü.
Nagaland sorkar inyakyim nung ochishia inyaktsü asoshi mulungtetba mapa indang ashidang, “Nagaland Lokayukta Bill 2015″ tatar senden nung benoka lir a er iba jagi ochimashi mapatem anema raraba nung tuluka yaritettsü ta Chief ministerisa metetdaktsü.
” Iba ‘Vigilance Awareness Week’ amongba mapang, nübortemi state nung ochimashi mapatem anema inyaktsüba ya Vigilance Commission kija mapa masü saka senso ajaki iba tongpang nung shilem tajung agia nokdaktsüla,” ta T.R.Zeliangisa metetdaktsü.

You must be logged in to post a comment Login