New Delhi, February 22,2016: Parliament nung Budget senden tenzüktsü anogo ka jilia Hombarnü New Delhi, Parliament House nung Union Parliamentary Affairs Minister, M Venkaiah Naidu-i party ajak senden ka ayongzüka amenba noksa nung angur.
New Delhi, February 22 (Agencies): 2016 Parliament Budget senden Mongolbarnü tenzüktsü, aser iba senden nung JNU ken o, Dalit nunger kaketshir Rohith Vemula soseta asüba ken o aser kiralongrartemi Pathankot amakba onüktem nung opposition aser sorkar tsüngda rongrong adoktsü akok.
February 23 nü Lok Sabha aser Rajya Sabha na külemi amenba senden nung Tir, Pranab Mukherjee-i o jembia tan budget session tenzüktsü.
Senotsü senden junga katettsü nükjidong nung February 16 nü Ato kilonser, Narendra Modi-i opposition lenirtem ajurua liasü aser tanü, Hombarnüa Union Parliamentary Affairs Minister, M Venkaiah Naidu-i party ajak senden ka ayongzüka kaogo.
Kasa anogo nung Lok Sabha Speaker, Sumitra Mahajan-i House nung party ajak nungi lenirtem den jembiogo.
Ano külen tanü Congress National Tir, Sonia Gandh-ia Congress Working Committee senden ka ayonga menogo.
Tawa party ajak senden amendang opposition lennirtemi Parliament nung JNU aser Rohit Vemula soseta asüba onük jembitsü takhangba agüja liasü, aser sorkaria item onük jembitsü melungogo.
MoS for Parliamentary affairs Naqvi-i, “Rajya Sabha kija nunga bill 30 tashi anendaka lir aser Lok Sabha nunga yamaji bill aika anendaka lir. Onoki Congress aser tanga party tem dang linük terenlok mapatem menokdangtsü atema mepishir,” ta shiogo.
Senden süngjema agitsüji ajak tebilemtsü asütsüla aser tang benoka aliba bill tem nung opposition-i tebilemba kar lemsatepnüra sorkari Parliament telung aser tema naprong nung angatsü mulunga lir, ta paisa shiogo.
Budget senden shilem ana lemdanger mezüng Feb. 23 nungi March 16 tashi aser tanabubaji April 25 nungi May ita tashi amentsü.
Ministry aser department balala nungi telangzüba agütsüba nung ajemdaker Ministry of Parliamentary Affairs-i onük 74 benoka jembitsü renema lir. Osang ajanga angazükba agi item rongnung legislative onük 62 aser financial onük 12 lir.
Item onük rongnungi sorkari kanga tongtibang onük 26 shimteta lir aser ministry balalai tan budget nungsa item ajakji agizükner.
Ano Parliament nung magizüktetei aliba bill 16 (Lok Sabha nung 5/ Rajya Sabha nung 11) rongnung GST Bill, Lokpal (Amendment) Bill, Factories (Amendment) Bill aser Anti-Hijacking Bill tem lir.
Rajya Sabha nung Congress Party-i aniba opposition züngsemtem timba asüba yong sorkari benokba bill aika magizükteti arudar.
You must be logged in to post a comment Login