Tanü PCC-i lumia longkak aittsü

Kohima, December 14 (TYO): State sorkar nem takhangba onük balala agütsüba mataloktsüba atema tejashi sayua Hokolbar anepdang 8:00 ako nungi tenzüka Public Coordination Committee (PCC)-i State Secretariat kima lumia longkak aittsü telemtetba agiogo, ta PCC Media Cell sangdong ka ajanga metetdaktsü.
PCC sangdong ajanga sorkar dang kanga tongtibang takhangba onüktem ataloktsütsü atema nenshia metetdaktsü; item takhangba rongnung- October 26, 2017 nü P&AR Office Memorandum ka ajanga NPSC kübok Grade-III posts züngdokba telemtetba agientsü, ACAUT-i akhangba ama Lokayukta amenoktsü aser NPSC-i achaayanga agiba tatidang stage ajak indang answer keys sangdongtsü densema lir.
Iba dak sendakba nung PCC-i Naga nunger senso tajung ajak dang lumia longkak aitba nung shilem magiaka item takhangba pusema longkak aitba nung shilem agitsü mepishia metetdaktsü.
PCC-i talisa public service jangrartem, kaketshirtem aser lanurtem dang, Naga nunger lotki nung ochimashi anema raratsüla aser pei temeten atema raraba nung shilem agitsüla, ta metetdaktsü.
PCC-i November 15-17 anogotem nung longkak aittsü sentong liasü, ajisüaka itemji ataloktsütsü ta state Chief Minister, T R Zeliang-i nangzükba ajanga longkak aitba sentongji thinena liasü.