Tanü PM Modi-i CEOs den senden amentsü

New Delhi, August 21 (Agencies): Mongolbarnü Ato kilonser, Narendra Modi-i lanur CEO tem den senden amentsü; iba sentong ya NITI Aayog-i ayongzükba lir.
Iba senden nung, asen linüki tang ajangshiba tayongzükba balala atema lenmang bushitsü atema lanur business lenirtem den shisa lemsateptsü.
Osang angazükba agi, iba senden nung linük nung public aser private sectors na tsüngda tesendaktep indang jembitsü. Iba sentong nungsa Ato kilonser, Modi den par cabinet minister tem aser secretary temi lanur CEO 200 dak tema den shisa lemsateptsü.
NITI Aayog-i ayongzükba ‘Champions of Change” sentong nungji CEO temi onük trok nung parnok tebilembatem lemsateptsü, aser item onük trokji – New India 2022, Digital India, Emerging a Sustainable Tomorrow, Health & Nutrition, Education & Skill Development aser Soft Power lir.
Kasa senden nungsa anema alibaren, shisaliok, digitalisation, skills development aser lanurtem atema mapa densema onük aika nung o lemteptsü.
Item onük nung shilem agir CEO tem indang tebilembatem angadangtsü aser iba sülen maneni kasa onüktem nung o lemteptsü.
Iba senden jelia Hombarnü Narendra Modi-i CEO tem den jurila senden ka menogo.
Official osang ka ajanga ashiba agi, Ato kilonseri CEO tem den ghonda trok mapang intoka senden amentsü.
Mongolbarnü senden ya Ato kilonseri CEO tem den tang agi tanaben ayongba senden lir.
Tamalen, August 17, 2017 nü Modi-i entrepreneurs ajurua senden mena liasü.