Tanü PM Modi-i China Tir Xi ajurutsü

Beijing/New Delhi, Aami/June 08 (Agencies): Qingdao yimti nung Shanghai Cooperation Organisation (SCO) summit nung adentsü atema Küptoknü Ato kilonser, Narendra Modi, China-i aotsü, aser iba mapang nung pai China Tir, Xi Jinping ajurua senden amentsü.
Tamalena tena aiben ajurua senden menogo, aser tena tesüsabuba senden amenba sülen ita ana shi dang lir maneni tena ajurutsü.
Yaküm India aser Pakistan na züngsem ti aliba security bloc nung züngsem kümdakja liasü. Iba bloc nung tanga linüktemji- China, Russia, Kazakhstan, Kyrgyzstan, Tajikistan aser Uzbekistan lir.
Beijing nung osangbenertem den jembidang China Institute of Contemporary International Relations (CICIR) nung Institute of South and Southeast Asian & Oceanian Studies Director, Hu Shisheng-i, “Iba ya tongtibang senden ka asütsü. Wuhan nung ayongba senden den medemdangtsü makok. Qingdao nung ayongba senden yabo Wuhan nung amenba senden ama masütsü,” ta metetdaktsü.
Küptoknü Modi-i China Tir, Xi den linük ana tesendaktep ken o jembitsü atema senden ka amentsü. Modi-isa Russia Tir, Vladimir Putin ajurutsüa akok, ta osang ka ajanga metetdaktsü.
SCO senden nung regional security aser kiralongra onük jembitsü, aser iba senden nung Modi-i Pakistan nungi kiralongraba indang jembitsü imlar.
Kasa senden nung Pakistan Tir, Mamnoon Hussain-a adentsü. Iba senden nung Observers linüktemji Iran den Mongolia, Afghanistan aser Belarus linüktem asütsü.