Tanü PM Modi-i Gujarat nung project aika semzüktsütsü

Ahmedabad (Gujarat), Luroi/August 22 (Agencies): Yangtepnü/Brihostibarnü Ato kilonser, Narendra Modi-i Gujarat semdangtsü aser iba mapang nung pai Gujarat Forensic Science University convocation densema sentong pezü nung adentsü, ta tanü ketdangsertemi metetdaktsü.
Ato kilonser, Narendra Modi ya tamalen Gujarat nung Chief Minister inyaka liasü.
Valsad jila anasa Jujwa yimdak lokti senden ka nung Pradhan Mantri Awas Yojana (gramin) kübok tajangzük angurtem e-griha-pravesh (online ki semzükba) sentong nung pa adentsü; iba scheme ya ajak talidak ki alitsü nükjidong nung Centre sorkari tenzükba scheme lir, ta ketdangserisa sangdong nung shia lir.
Iba scheme kübok Gujarat nung ki lakh 1 dak tema yangluogo, ta parnokisa metetdaktsü.
Kasa tesem nung pai Dharampur aser Kaprada talukas nütsüngtem atema water supply project ka tenzüktsütsü.
Valsad nung sentong tembangba sülen Ato kilonser Junagadh jilai aotsü aser idakji pai project aika semzüktsütsü; item project rongnung tang tasen yangluba Gujarat Medical and Education Research Society hospital building tasenba aser Gir Somnath district kübok Veraval jila nung fisheries college ana semzüktsütsü densema lir.
Ato kilonserisa Police Training College ground, Junagadh nung lokti senden ka nung jembitsü, iba sülen Gandhinagar nung pa leniba nung Gujarat Forensic Science University convocation sentong agitsü.
Tesüsa pai Somnath temple trust senden nung adentsü aser New Delhi-i meyipa aotsü.
Somnath temple trust nung Modi aser BJP National Tir, Amit Shah naprong trustee lir, aser iba senden nung Amit Shah-a adentsü. Somnath temple trust nung Tirji taoba mapang Gujarat Chief Minister, Keshubhai Patel lir.
Ato kilonser, Modi-i Chiteni/July 20, 2018 nü Gujarat sendangtsü sentong liasü, ajisüaka state tesem aika nung tzünglu sashia aruba ajanga sentong thinena liasü.