Tanü PM Modi’er Cabinet ulushitsü; Tejak tasenpur 9 anioktsü akok

New Delhi, July 04 (Agencies): Ato kilonser, Narendra Modi-i asüng par cabinet ulushitsü atema telemtetba agiogo aser tejak tasenpur parnok tuku shimtsü akok, ta BJP osang ka ajanga ashi.
Tanü sorkar tongti otongdar, Frank Noronha-i twitter ajanga, “Asüng (Mongolbar) anüngdang 11:00 ako nung Cabinet ulushitsü,” ta metetdaktsü.
Minister tasen shimtsü atema tamalen Modi-i Amit Shah aser finance minister, Arun Jaitley na den o lemtepa liasü.
Sangküm Uttar Pradesh nung assembly election agitsü aliba temulung nung yur iba ya BJP-i agiba mera ka asütsü.
Tasenpur rongnung Uttar Pradesh nung BJP den teloktep party, Apna Dal nungi OBC Lok Sabha züngsem, Anupriya Patel den BJP lenirtem SS Ahluwalia (LS), Vijay Goel (RS) aser Bikaner nungi MP, PP Chaudhary nunger densema lir, aser parnoki Hombarnü Party Tir, Amit Shah ajurua liasü.
Ministry nungi anentsütsüpur rongnung Rajasthan nungi Sanwar Mal Jat den arishi küm 75 ser temapur ana- Najma Heptulla aser Kalraj Mishra na dena lir ta osang angazüker.
Ano minister kar anentsütsü akok ajisüaka tongti ministry pezü- Defence, Finance, Home aser Foreign Affairs nungbo temelenshiba malitsü, ta party osang ajangasa ashi.
Ano Minister tem rongnung Assam Chief minister, Sarbananda Sonowal-i azüngtettsüba sports ministry menden-a tazüng lir.
Tang Ato kilonser densema Union minister 64 lir, aser linük Temzüng kübok minister timba agi 82 tashi alitsü lateta lir.