Tanü putu Azüngashi balaka nüngdaker

~ T. Meren Paul, Tzüwar Apartments, 91, Lower PR Hill, Kohima.

Tejen yimsü yimpong dangi meyiptsü ABAMi nokdanger ta omen (heading) agütsür Tir Yimyim September 30, 2015 adok nung anempongba, azüngashiba aser akhi yimya dangi meyiptsü ken-o koba jembir, ta sür adokba oren nung tashishitep aser jangjashitep o maneni olemsabang nung züludagi. Omen nung shia alibaji o tongmelang ka dang saka mezüng paragraph nung reprangra anempongba, azüngashiba aser akhi yimya dangi meyiptsü ken o koba jembir ta onük tejangja asem indang shia angur. Aser ibai nüngdak asüba agi süoki yia jembir ta angateter. Asenok tamangertem shingaia akhi yimsü aser yimya nung anempong mesüra azüngashi mesüdagi ta nibo amanger. Kari yamaji inyaka lira ABAMi nokdanger ta ABAM kübok aliba arogo aser tamanger ajak dangi tekümdangtsü sangdongbaji bo tim ta angateter. Saka shaingaia azüngashi masütsü ta sangdongba oren nungji tebilemdangtsü onük kanga tulu keta lir.
Asen Ao oshi nung “Azüngashiba” ta asüba ya English oshi nung “Oath” ta meyipzükdi. Azüngashiba mapa ya telok ana tsüngda mesüra telok kar matsüngdang nisung kati mesüra nisung ana tsüngda (Tsüngrem tenüng nung asütsü akok masütsüa akok) ochi kuli ayimoktsüba aser tatemzükba mapa ka inyaktsü kuli mesüa talenba keta nangzüktepba/azüngashiba (oath/agreement) dang ajatsü südi. Ano, iba den tera mesükteper saka tera teladakba nung amshitettsü, English oshi nung “Swear” ta süra medemer o medemer na, nisung ana tsungda ochi jembir ta ashidang (I swear) ta ochi puküm azüngashiba aser kecha talenba maketba O asütsüa akok.
Ochi puküma azüngashiba mapa ya akhi alemli tamangba yimsü amshia külem küja nung dang masü saka asen sobaliba nung ochi jembitsü aser inyaktsü saka yazüyabong mapa shingaia meinyaktsü asoshi tetsübutsü aser tashibangtsü atemzüka ayuba mapa ka lir ta angateter. Azüngashiba mapa ya akhi tar nunger mapang nungi alima ajak nung meimchir ajaki amshia aru. Asen tzürapurtemi tsüng balala; Meyutsüngba, Anüngtsüngba, Longkitsüngba, Lijaba aser moijing item külemdang azüngashiba maparenji balaka saka ochi puküm asoshi ali chitepba aser küyi bo, pongzü bo nung nguiter azüngashiba maparen balaka aser külemküja den tesendaktep mali amai angateter. Alima kin rongnung Tsungremi shimteba kin, Israel nungerisa tangar kin dang nungi temütsünga taretba azüngashi mapa ya benshia aruba laishiba nung asenoki azünger. Oboula nunger mapangbo lika lim, kimong lumong aser kin kidong otsü mepetmesü dak alaka tanü putu nung ama azüngashi nüngdakba maparen aikabo melika sülaba, saka Tanü putu nung iba azüngashiba mapa ya alima ajak nung amshitsüsa nüngdakba yimya aika tenteta aliba asenoki angur aser ajangshier.
Alima ajak nung yimsüsür election nung takok ngur yimsüsüba menden nung amentsü asoshi tamasa pei lima temzüng dak ajemdaker azüngashiba (oath taking ceremony) Obendanger dem obendangba menden nung amentsü azüngashiba, Okadak (court) kuli agutsütsü azüngashi agiba, Govt. officer-tem Public Account Committee nung ochi kuli agutsütsu ta azüngashi agiba, Sepoy/Police training temer külen mapa nung inyaktsü azüngashi agiba (kusum), Bank nung sen aputsü (bank loan) asoshi ni ji pa-a ta azüngashiba, admit card mesüra mark sheet samaba aser yamala mesük document tanaben yanglua agizüktsü (duplicate) atema ni ji pa-a ta azüngashiba, Ki mesüra ali alidang/ayokdang azüngashia affidavit nung tayokba/taliba zülutepba, contract/supply mapa inyaktsü tezüngzüktep zülutepba (agreement) Passport application nung azüngashiba, itemji ishika tuteta ashir saka yamalaji aika alitsü.
Asenoki azüngashiba mapa ya ajakbo asen tamangba yimsü aser Laishiba tesayuba anema inyakba ta mangateti mapa agi bendangtsü nüngdaker ta rajemtsüla. Non Judicial Paper koba dang asenoki Affidavit paper ta ajar iba ya azüngashiba kaket ka lir anungji asenok Aoer Khristanbo kenyongi azüngashi masütsüla ta süra tanü lima asenok lia aotsü tasak dang masü tamakoktsü akümtsü. Azüngashiba ya ochi mapa nungi matsüngshitsü asoshi asen dang nungi tuluba mesüra temaba tenüng ka madang tezüngzüktepba agiba aser ochimashi mapa inyakba mapa nokdangtsü asoshi ibai kanga nüngdaker. Ibri 6:16 “Kechiyong nisungi pei dang tuluba agi azüngashir, aser parnok bangsemtepba ajak nung azüngashibaji o tatembang lir.”
Azüngashi mesüi shinga Governor/MLA/Minister/Obendanger/Sepoy/Police/Commission Member makümtsü, asenok shinga bank account melapoktettsü, asenok shinga courti moutettsü, kimong lumong register mesütettsü, contract/supply meinyaktettsü, passport a shinga apply mesütettsü, yamala mapa aika tanü putu azüngashiba majangi meinyaktetter.
Alima yimya aser mapa nung dang masü saka Tsüngrem tenzükba mapa nunga maibelentsü, mejimitsü aser memetsüdaktsü asoshi Tsüngrem tenzükba mapa nung ordain asüdang Tebu, Techir aser Temeshi Tanüla tenüng nung azüngashia ordain asür. Tsüngrem mapa/wadang nung toklang tenzüktsü Commission asüdang Tebu, Techir aser Temeshi Tanüla tenüng nung azüngashia Commission sür ang yoker. Tamang tetenzükdang Yisu Khrista pei kümtetdakba ta agizüka tzü nung baptiba mapang Tebu, Techir aser Temeshi Tanela tenüng nung azüngashia baptism agütsür. Khristan kiyimba nung Tebu, Techir aser Temeshi Tanüla tenüng nung azüngashia kinüngbo aser kinüngtsü asütsü aser tasü agi mepila tashi alitsü nangzüker.
Ni laisher ka mesüaka azüngashiba indang lai nung bushitsüngdanga laisher kar-i teratet agütsüba (commentary) laishiba tapu aser tekong aigka rongnungi kar lemsatepnür. Azüngashiba nung talenba küta lir ta Yisui tesayuba agütsüba laishiba nung angur. Mati 5:33 “Tana (again) alima nisungtem dang ashiba ya nenoki angashiogo, ‘Nai züngyazüngku (swear falsely NKJV)tesü, saka nai züngzükba Kibuba tsüngdang atalokdakjang”. Iba tekong tetetzü ana, mezüngpuba- nai azüngashi tesü ta ashibaji nai atemzükbaji meinyaktetra atakatem kaoalir azüngashi tesüh ta tekümdangtsü ashir ta MacArthur Commentary nungbo shia angutsü. Tanabuba nung, nai azüngashira nai züngzükba Kibuba tsüngdang atalokdaktsütsüla ta teyur. Tekong 34 nung “Saka ni nenok dang shidi, kecha azüngashi tesü, kotak atema masü, kechiaser aji Tsüngrem Chuba menden lir” New Bible Commentary nung teratetbaji Mosa ozung agi tekümdangtsü azüngashidaktsü saka Yisuji nisung mulong tasen küma yanglushitsü aser melenshitsütsü inyaktsü aru asünung joko azüngashi menüngdaktsü aser kotak nunga azüngashi menüngdaktsü ta ashiba lir ta rateta agütsür. Yisui iba o jembitsüsa akümbaji Pharisees aser tezülurtem anemsü mapa aiben Tsüngrem tenüng nung teyazü azüngashiba tuteta metongshitsütsü jembiba ta laishiba ratet kar nung angur.
Mosa ozüng asembuba nung, Lipok 20:7 “Nai Kibuba nü Tsüngrem tenüng amajok nung tetetshi, shibai amajok nung pa nüng tetshidir, Kibubai pa maitsui meyutsütsü” kanga jangjaa shia alibaji Tsüngrem tenüng nung azüngashier mapa meinyaktetba atakadem angutsü indang ashir saka inyaktettsü pur asoshi Kibuba tenüng nung azüngashibaji tenokdangba mali ta jangjar.
Abraham aser Abimelek na tsüngda yimjung azüngashiba, Lipok 21:22-32. Abrahami Sodom chuba dang Tematiba Tsüngrem Kibuba agi azüngashiba, Lipok14: 22. Yakob o Laban na alushi ar ladangba azüngashi, Lipok 31: 48-53. Isak aser Abimelek yimjung azüngashiba, Lipok 26: 28 Kibuba nü den lir ta onoki jangja jangjaa angur, aser asenok tsüngda nung tezüngzüktepba takang ka ayutsü nüngdak ta onoki ajiteter.
Mapa balala asoshi azüngashiba, Lipok 24: 2…nü teka kü tepi pok nung yuang, 3- aser ni nü dang Kibuba nung Tsüngrem agi azüngashidi, Kanan nunger shir den ni alir, parnok jalatem nungi kü chir Isak asoshi kibutsü tagidaktsü. 41.. .idangji iba tezüngzüktepba nung na kecha tai malitsü (English nung Oath ta zülua lir)
Meyipa magitetba azüngashi. 1 Samuel 14: 24…Sauli nisungtem dang azüngashia ashi, “Nisung shibai aonung matong tashi aser ni kü tsükchirdak mang mayangdang chiyungtsü chidir atakadem kaoang”. Obendanger 21:18 ..kechiyong Israel chirtemi azüngashia ashi, Benjamin nem shibai kibutsü agütsüdir, pa atakatem sang.
Tamang makatetba kinüngtsütem tendangba azüngashiba, Züngdangba 5: 12-31. Tekong 22 ji dang yangi zülur, Tang iba atakatemtsü ya nü tepi kongrepba aser nü tepok waka nü nu mendeni idakjang, aser tetzür jagi langzütsü, Ni Mulunger, Kibubai yamaji inyakangma.
Solomon chubai Tsüngrem dang sarasademba, 1Chubatem 8: 31 Nisung kati pei kiyonger anema tai menara, aser pai azüngashidaktsütsü atakatem o doktsüra, aser pai arur nü temeshi tenla sabang nung nü kidang azüngashira, 32. Idangji nai Kodak nungi angang aser inyakang.
Tsüngremi taochi nangzükba, Ezekel 16:59 …ni oda nai inyakba ama, koba agi tezüngzüktepba raksaba agi azüngashitepba mezüngmeshi, ni nü dang benshitsü, 60…aser ni nü den tatem maka tezüngzüktepba yanglutsü, 62… aser kü tezüngzüktepba ni nü den yanglutsü, aser ni kibuba ta nai metettsü. Tiyazü nung tezüngzüktep agiba lendong indang Hosea 10: 4 Tezüngzüktepba nung tiyazü azüngashia parnoki amajok o jembir, anungji alu angensaba ama, obendngba adoktsü.
Laishir aikati teyubaji asen Kibuba Yisu Khristaia Taküm Tsüngrem tenüng nung ochi asoshi azüngashia temaba putir Caiaphas-i asüngdangba langzü. Mati 26:63, Saka Yisui Kuk a mesui ali, aser temaba putiri pa dang ashi, Taküm Tsüngrem tenüng nung ni na azüngashidaktsür, Na Tsüngrem Chir Khristaji asü masü? Onok dang shiang. 64 Yisui pa dang langzü, “Nai aji oda shiogo.”
Anempong indangji shisadangra akhi yimsü nung kidang anchanu dang rezük nungah (hatching of chicks) anempongba liasü saka tanü putu nung tamangertemi tejen yimsü amshia anempongba mangashier aser mangazük. Saka tang asenoki amangba Yisu Khrista yimsü nunga lumia meshiteta anogo/hopta tepiyong sarasademba ya asen Ao oshi nung Tsüngrem tsüngdang anempongba ta nibo angateter, ni tai asütsüa akok.
Asen Aoer kakütshir kanga talangka azünger aser temeteter lanur aika adokdagi saka zülutsü aser azüngtsü dang metetba rogo nübor timba asütsü, ano angazüka metetba aser shisatsü meimchir ajak nung Tsüngremi kasa lemzükja mali, anungji azüngashiba aser anempongba ya laishibai melaba koba aser memelaba koba ar lokti nem angatetdaktsütsü kanga nüngdaker aser ABAMia laishiba agi teyuba ama tanü putu den apet libaliro nung nüngdakba azüngashiba aser menüngdakba tejen yimya külemküja nung amshia aruba anempong aser azüngashiba rateta kaküt adoka nübor nem züngdaktsütsü nüngdaker ta ajiteter aser aji tim asütsu. Ajisüaka, o kanga tongmelang agi dang osang kaküt nung olong ka merepoktsüba jagi dangbo meperier saka tali ang makmakshimakdaktsür. Tsüngrem leniba tulu nung ABAMi amangba pur nung yakta teratet tejangja agütsütsüta imlaa atadi.