Tanü putu nung tesayur kaji kanga tenendak asütsüla: Tsopoe

Kohima, Aami/June 06 (TYO): Brihostibarnü School Education Director, Wonthungo Tsopoe-i tanü putu nung sorkar school tesayurtemi state nung shisaliok tajung agütsütsü atema asüngsashir kanga nendaka inyaktsüla, ta ayongzük.
Brihostibarnü Kohima nung Science aser Mathematics graduate tesayurtem training nung jembidang Director-i, “Loktiliba ajak nung shisaliok ya tiyongtsü ka lir, aser iba ya ajanga lokti ka tashi itta ainba nung kanga tongtibang shilem agir,” ta ashi.
Tang Nagaland nung shisaliok jenjang nung tayongzükbatemji shisaliok tsütsü business inyaker entrepreneurs ya lir, koba ajanga sensaker kibongtem nungi kaketshirtemibo shisaliok atema senotsü magütsüteter, ta pai ashi.
Iba dak sendakba nung pai, sorkar school nung tesayurtem dang item tayongzükba koktettsü aser kaketshirtemi tanga den toktepa takok angutsü atema mera alia oa inyaktsü ayongzük.
Paisa sorkar school nung tesayurtem, talisa maths aser science tesayurtem dang kaketshirtem atema mera taliba agia inyaktsü ajungshi.
Tang senior tesayurtem aika mapa nungi anisüngzüker aser item mapa tazüng atema junga zünger kanga temsüa aliba lanurtem shimmer, ajisüaka tesayuba maparen nung nendaka meinyaker, ta pai sasaba olen ka metetdaktsü.
“Shisaliok atema kanga tetemsü tesayurtem nüngdaker saka parnokji pei mapa nung kanga tenendak asütsü nüngdaker,” ta paisa ashi.
Mapang ka nungbo sorkar school tem nung maths aser science tesayurtem timbaka tzümartem liasü, aser parnoki tenzükba ajanga Naga nunger shisaliok jenjang renlokdaktsü, ta pai pelaba olen ka shisem.
Tsopoe-i tesayurtem dang, “Meimchir tenzükbaji Tsüngrem tenzükba lir, ibaji mamadoki pei mapa nung kanga nendaka tenzüktsüla,” ta ayongzük.
Anogo asemnü training ya Department of School Education-i Ramietech Solutions den senteper ayongzük aser North Eastern Council-i fund agütsü.