Tanü Rahul Gandhi-i Assam election nüboyim tenzüktsü

Honibarnü gmch auditorium, Guwahati nung Congress Tatong Tir Rahul Gandhi pela agizükba noksa nung angur. 

Guwahati, December 11 (Agencies): Asüng Honibar nü Congress tatong Tir, Rahul Gandhi-i taruba Assam assembly election atema nüboyim sentong tenzüka Barpeta district nung ‘Communal Harmony Walk’ nung shilem agitsü.
Muslim nütsüng aika aliba district, Barpeta ya Putu 16 buba mapang Vaishnavite sobaliba akhümket tesem ka lir.
Hokolbar nü Rahul Assam tonga aruogo aser Honibar nü pai anir Vaishnavite tekülem ki (Satra), Barpeta Satra nungi Muslim nunger aika aliba tesem, Medertari tashi kilometer 7 ‘Communal Harmony Walk’ akatsü.
2011 Census nung, lower Assam nung aliba Barpeta district nütsüng 16,93,622 lir, aser iba nungjagi Muslim nunger nütsüng shilem 70 dak tema aser Hindu nunger nütsüng shilem 29 lir. Iba nung ya assembly constituency 8 lir, aser item rongnung All India United Democratic Front (AIUDF) MLA 5, BJP MLA 2 aser Congress MLA 1 lir.
State Congress Tir, Anjan Dutta-i, “BJP-i tamangba lokti nung telemsa adokdaktsütsü atema Assam nung tesem mali aser Barpeta ya tamangba lokti balala tesünep nung aliba temaitsü lir,” ta ashi.
“Barpeta Satra nungi tamangba lokti tsüngda tesünep jajaji Rahul-i anitsü. Pai nüburtem ajurutsü aser Medertari-i aoba lenmang nung parnok den jembitsü. Official sentong meliaka iba tesem nung nüburtemi Gajia nung lokti senden ka ayongzüka lir,” ta Dutta-isa ashi.
Rahul den AICC general secretary CP Joshi (Assam in-charge) aser Youth Congress National Tir, Amarinder Singh Raja nati-a shilem agitsü.