Tanü Riphyim Old PS-31 nung re-poll asütsü

Kohima, April 24 (TYO): 37-Tyui Assembly Constituency kübok Riphyim Old-III nung Polling Station-31 nung re-polling atema security peria mapa lemzüktsütsü aser video cameras ayutsü ta Nagaland Chief Electoral Officer, Abhijit Sinha-i tanü ashi.
Central Armed Police Force aser IR (NAP)-i iba re-poll mita anüktsü. Asüngnep 7:00 ako nungi nikongtsütsü 4:00 ako tashi polling agitsü, ta CEO-i ashi.
ECI-i re-poll atema General Observer inyaktsü atema Armstrong Pame, IAS shim aser pa Wokha tongogo, ta paisa shisem.
Iba polling station nung vote enoktsür ajak agi 602 lir aser parnok rongnung tebur 288 aser tetsür 319 lir.
April 11 Lok Sabha elections mapang PS-31 Riphyim nung mapa lemzüktsüba polling ketdangser pezüi mapa shitak meinyakba atema tai tonglokja ken o benokogo, ta CEO Abhijit Sinha-isa metetdaktsü.
State Congress-i Wokha police station nung FIR benokba nung ajemdaker par pezü anema ken o benok aser State Election Department-ia Election Commission tsüngdang ken o ka benokogo, ta paisa shisem.
Iba tatalokba atema jungjunga bushisüngdang südar aser bushitetba osang nung ajemdaker mapa inyaktsü, ta Sinha-isa ashi.