Tanü santem asoshi tsünü tamajungtibaji election asütsü

Mokokchung, Oct 22 (TYO): Tanü asen lima nung election ya sannükertem asoshi tamangertemi benshiba temenen mapatem anema raratsüba tongpang tuluka lir. Ibai shi azü den melangtepba tongpang ka masü saka tanela tongpang, anungji, sarasadem agi tua inyaktsüba mapa ka asütsü.
Iba o ya Tir Yimyim yimozülur Wb. K.Temjen Jamiri Honibarnü Yisemyong nung Langpangkong Sannüker Telungjem  senden ka  nung “Clean election campaign nung sannüker ka teinyaktsü” onük nung ajemdaker jembidang metetdaktsü.
Tanü asen lima, lokti aser Arogo nung repranga lia Laishiba nung shia aliba tsünütem nem santem sür odaktsübaji election ya lir. Iba mapang sannükertem odang repranga dang alitsü asü, kechi inyaktsü? ta paisa tasüngdangba ka agütsü.
Asenok asoshi election ya kechi (?) ta asüba onük ka lemsatepdang, “tanü santem asoshi tsünü tamajungtibaji election ya asütsü”. “Samarotemi atenba ama, Aor tamangertemi küm pezü dang amangteter aser küm pungububa nung kodang election arudir, idangji election tsünütem nem ngusetdaktsür”, ta paisa shisem.
Paisa clean election indang kar lemsatepdang, ‘election agi asen lima, lokti aser asenok ajak kanga menena lir, ibaji merükteta election timi agitet nung dang, nüburtem asoshi sorkar tajung ka kümtettsü’. Election merüka agitsü asoshi “asen taküm aser kibong tama merüktettsüla”, ta paisa shisem.
Laishiba nung aliba ama, “tenüng tajung akaba, tanela agi sünga aliba, shisataka, Tsüngrem metetba nisung shimtettsü asoshi asenoki election nung timi shilem agitsüla”, ta paisa sannükertem den lemsatep.
2012 küm US election nung nüngtugu sayutsüngir Billy Graham-i “Vote Biblical Value” ta sür yimyim ka ayimoktsü. Iba yimyim ajanga pai America nungertem dang, Tsüngrem o nem anitaktsüba aser taküm libaliro asüngteta aliba candidate yaritsü metetdaktsü, iba amaji Tsüngrem tenzükertemi marendaki election nung shilem agitsüla ta paisa atishia ashi.
“Sannüker aika pei mapa nung tamakok angubaji ajak peladaktsütsü merangdang ataloker” ta asüba o ka rateta ashidang, “Tsüngrem masü nisung peladaktsütsü meranger, temenen jashidaktsütsü apayur, tai dang tai ta meshiteter, telemtetba magiteter, nüngsen metizükteter, ta Tir Yimyim yimozülurisa metetdaktsü.
“Shiner aser mangdang angur yur lumia takzüdaktsür, ochimashiba sen den injang bomb aser yi bendena yur election-i air”, ta paisa tanü election-i airtem jakla kar tuteta ashi.
Election timi agitsüba tongpang nung ya rongsen meimba nisungtem nem Tsüngrem meimdaktsütsüsa sannükertemi inyaktsüla  ta paisa metetdaktsü.
Paisa election temenen anema raratsü asoshi teinyaktsü kar lemsatepdang, ozü yimer, ozü party, ozü nisung ta asüba nungi Tsüngrem tsübuba aser nüburtem meimba tetemsü yimsüsür ka meshia sarasademtsüla ta akhi sarasadem yimya ka melentsü nüngdakba o ka metetdaktsü. Sannükertemi anir kibong shia dangi oa election nung timi shilem agitsü ajungshia sarasademtsütsüla, ‘chain of prayer’ ayongzüka kibong ajak shilem agidaktsütsüla,sentep nung election dak aketba onük nung Lai teratet  agüja jembitsüla aser yimten yimsüsürtem den külemi tenla kidang sarasadem mapang agitsüla ta paisa tebilemba kar lemsatep.
Iba den ano yimdak vote alitsü atema sen aser yi amshiba mapatem nokdangtsü atema Arogotsür aser lanurtem nem shilem agidaktsütsüla, election mapang candidate dang tenla memeshitsüla, masüngdangtsüla aser kecha menangzükdaktsütsüla aser election anogo nung sannükeri sarasademer pa tama sür pei vote pei ajentsü tenzüktsüla, ta paisa tebilemba kar metetdaktsü.
Paisa arogo nunger tenla ki meshiteta semzükdang aser jubilee ama sentong nung yimten yimsüsür tongti tesemdanger mesüdaktsütsüla ta metetdaktsü.
Iba senden nung Langpangkong tzükong kübok Arogo balala nungi sannükertem den LKM Clean Election Campaign Committee züngsemtem dena liasü.
Langpangkong Sannükertem Telongjem 28 buba senden ya Oct 21 nü tenzük aser Oct 23 Deobarnü tembangtsü.