Tanü Sarbananda Sonowal den kilonser 10 tenangzükba agitsü

Guwahati, May 23 (Agencies) : Assam nung tan mezüngsüa Bharatiya Janata Party (BJP) sorkar arua state Chief Minister tasenba Sarbananda Sonowal den külemi kilonser 10 Mongulbarnü tenangzükba agitsü, ta osang angazüker.
BJP-ibo osang tejangja mashi ajisüaka osang kar ajanga ashiba agi, tenangzükba agiba sentong nung Sonowal den BJP nung nisung pongu aser parnok den loktepba telok Asom Gana Parishad (AGP) aser Bodoland Peoples’ Front (BPF) party tem nungi nisung anana alitsü.
AGP-i parnok telok nungi nisung pongu aser BPF-ia par party nung nisung pezü cabinet nung shimoktsü ashiba, BJP sangdong ka ajanga metetdaktsü
“Onok den lokteper inyakba party ajak nungi cabinet nung nüngdakba ama shimoktsü,” ta state nung BJP lenir kati ashi.
Tan assembly election nung BJP nungi candidate 60, AGP nungi 14 aser BPF nungi candidate 12-i takok angu. Aser ibaji ajanga menden 126 nungi parnoki menden 86 ngutet.
Tenangzüktep agiba sentong ji Veterinary College nung akatsü aser tang yongi Guwahati yimti rangben nung security kanga akangshiogo. Sentong nung Ato Kilonser Modi, BJP Tir Amit Shah, Baba Ramdev aser Sri Sri Ravi Shankar nunger dena tongtibang nisung 100 dak tema adentsü.