Tanü Saudi Foreign Minister, Adel-i Russia semdangtsü

Riyadh, August 08 (Agencies): Saudi Arabia Foreign Minister, Adel al-Jubeir-i asüng, Deobar nü Moscow semdanga Russia Foreign Minister, Sergei Lavrov den senden ka amentsü sentong renemba osang ka Russia foreign ministry-i tanü Honibar nü metetdaktsüogo.
Adel-i Syria nung mangatettep tulu adoka tongbang kanga sashia raraba aser Islamic State (IS) ta ajaba kiralongrar teloki Syria nung lendong kanga sashia atalokdaktsüba den sentakba onük Lavrov den benoka jembitsü sentong renema lir.
Adel o Lavrov nati tesüsa tan August ita 3 nü Qatar nung ajurutepa US Secretary of State, John Kerry den arok senden ka mena Syria den sentakba onük tongtibangsüa jembia liasü.
“Syria nung adokba mangatettepbaren tekaraba nung bentetja par linük nung tanaben yimji yimjung bener arutsütsü asoshi lenmang aser tasa bushitsü nükjidong nung ozü lenir anati asüng senden amentsü renemogo,” ta ministry-i ashi.
Par linük anati külemi lungjemer IS telok densema kiralongrartem anema raratsü asoshi alima teloktep mitkar telok ka tentettsü onüka benoktsü renemba osang ka ministry-i shisem.