Tanü SC-i Ayodhya ken o obendang anema temepishiba angadangtsü

New Delhi, Luchii/December 11 (Agencies): November ita nung Supreme Court-i Ayodhya ken o nung obendang agütsüba anema obendang tanaben reprangshitsü atema temepishiba benoka lir; aser iba temepishiba ken oji December 12 nü Supreme Court-i angadangtsü.
Supreme Court-i iba ken o ya angadangtsü atema telemtetba agira parnoki telok ajak ken o tanaben angadangtsü, saka Supreme Court-i iba ken o angadangtsü atema memelungra asüngsa thinentsütsü.
Ayodhya nung Ramjanmbhoomi-Babri Masjid ali mangatettep ken o nung November 9, 2019 nü Supreme Court-i agütsüba obendang tanaben reprangshitsü atema tang tashi nung temepishiba ken o tenet Supreme Court nung benoka lir.
Hombarnü social worker 40-i akümba telok katia Supreme Court obendang anema temepishiba benoka lir; parnok rongnung Harsh Mander, Nandini Sundar aser Pravat Pattnaik nunger densema lir.
Osangbener den jembidang Mander-i, “November 9 nü obendang reprangshitsü atema onoki temepishiba agütsüogo,” ta metetdaktsü.
Supreme Court-i Muslim nunger mosque ka yanglutsü atema parnok nem ali acre 5 agüjang ta tuyuba anema Hindu Mahasabha teloki-a temepishiba ka benoka lir.
Taoba ita Chief Justice Ranjan Gogoi leniba nung Supreme Court bench kati Ayodhya nung aliba mangatettep li nungji Ram tekülem ki ka yanglutsü atema obendang agütsü, iba denji külemi Muslim nunger tekülem ki ‘mosque’ ka yanglutsü atema Sunni Waqf Board nem ali acre 5 agüjang ta Centre dang tuyua liasü.