Tanü Secretariat Complex, Kma nung NEPEx exercice agitsü

Kohima, August 29 (TYO): August 30, 2017 nü state tesem ajaklen NEPEx exercise agitsü aliba dak sendakba nung Nagaland State Disaster Management Authority-i Nagaland nung Richter scale 8.4 nung menoknok anok nungbo koma süla, aser koma renema lir ta asüba exercise agitsü, ta metetdaktsü.
Menoknok maginitude 8.4 indang Preparedness exercise ji state tesem ajaklen August 30, 2017 nü agitsü aser anüngdang 11:00 ako nung Secretariat plaza ground nung siren aputsü; Siren apuba sülen secretariat staff ajak dang peipei mapa inyakba table kübok minute 2 shi atsüktsü mepishir, ta Nagaland State Disaster Management Authority-i metetdaktsü.
Minute 2 sülen menoknok anokbaji tembangogo, anungji kima alu nunga kecha masü ta bilema peipei takdang nungi temai (Secretariat Plaza) adoka moapu nung adenshitsü mepishir, ta parnokisa metetdaktsü.
Iba exercise agiba sülen pei office mapa maneni inyaktsü atema peipei takdangi aotsü akok; iba ya khen atema terenemshiba exercise ka dang lir, anungji nübur dang maoksatsü mepishir, ta State Disaster Management Authority-isa metetdaktsü.