Tanü Shitilong S/A o Fusion S/C na MDFA final asayatsü

Mokokchung, Oct 23 (TYO): October 6 nü nungi tenzüka XXI buba MDFA asayamung yangi Imkongmeren Sports Complex Mokokchung nung asaya arur. Tanü tesüsabuba semifinal match yaküm champion Fusion S/C o Dilong Y/A na asayaba Fusion-i goal 2-0 agi koker parnoka final-i igo. October 24, Honibarnü final match Shitong S/A o Fusion S/C na asayatsü.
Tanü Fusion o Dilong na asayadang mezüng asaya tesadang nung mapang apuloktsüba nung Fusion nungi Jersey No-16, Nyithong-i goal ka yoka goal 1-0 nung mezüng asaya tesadang tembang.
Anisüngzüker külen tanabuba asaya tesadang tenzüker tatsüka dang lir, minute 54 buba nung Fusion nungi Jersey No-18, Khekrietsira-i par telok atema goal tajung ka metsüoktsü.
October 22 nü mezüng semifinal match Shitilong S/A o N.U Lumami na asayaba Shitilongi goal 6-2 agi N.U tsükdaktsü. Final match-ji jangratemtsüka asütsü kechiser telok anaprongla sakuku tajung lir.
Final match-ji nikongdang 1:00 ako nungi tenzüktsü aser asayamung shibangba sentong nung Parliamentary Secretary IPR, Khekhaho Assumi tongti tesemdanger asütsü jaoka lir.
Iba asayamung ya kümshi MDFA-i district nung football meimer lanurtem ajungshia anitentsü nükjidong yur ayongzüker.