Tanü Sushma Swaraj-i Pakistan semdanger, Sharif-a ajurutsü

New Delhi, December 07 (Agencies): Bangkok nung India aser Pakistan na National Security Advisors (NSA) senden amenba sülen anogo ana lir Hombar nü sorkari, asüng External Affairs Minister Sushma Swaraj Islamabad-i aotsü, aser iba mapang nung lai Pakistan Ato kilonser Nawaz Sharif ajurutsü imlar, ta ashi.

‘Heart of Asia’ 5buba Afghanistan Ministerial senden nung Sushma-i Pakistan foreign minister Sartaj Aziz-a ajurua senden amentsü.

“December 9 nü Islamabad nung External Affairs Minister Sushma Swaraj leniba nung India telok ‘Heart of Asia’ 5buba Afghanistan Ministerial senden nung adentsü,” ta External Affairs Ministry otongdar Vikas Swarup-i ashi.

Tawa India-Pak na Bangkok nung NSA senden miima amenba atema opposition-i aitsüba mapang ka nung Pakistan osang ka ajanga, Afghanistan senden mapang jurila senden akatsü, ta shiogo.

Taküm July ita nung India Ato Kilonser Narendra Modi aser Pakistan Ato kilonser na ajurutepba sülenbo tang mezüng India tongti ketdangser kati Pakistan semdanger asütsü.

Swaraj den Foreign Secretary, S Jaishankar-a densema aotsü.

Tawa Thailand yimtiba Bangkok nung NSA senden amenba mapang nung Jaishankar-a densema liasü.

“Asüng Sushma Swaraj-i Pakistan semdangtsü aser la meyipa aruba sülen lai Pakistan den kiralongraba onük densema onük balala nung senden amenba osang tejangja agütsütsü. Indo-Pak ken o jembiba sangdongtsü atema sorkari melunga lir, aser iba osang ya house anaprong nung metetdaktsüogo,” ta Parliament kima Rajiv Pratap Rudy-i osangbenertem dang ashi.