Tanü Tamil Nadu assembly nung ‘floor test’ agitsü

Chennai, February 17 (Agencies): Asüng Honibarnü Tamil Nadu assembly nung ‘floor test’ agitsü aser iba atema taoba Tamil Nadu Chief Minister, O. Panneerselvam’er camp-i secret ballot ajanga ibaji agitsü takhangba agütsüogo.
Hokolbar anepdang Panneerselvam’er kidang senden ka mena o lemtepba sülen AIADMK nungi teshimtet lenir kar Secretariat-i oa Speaker ajurua pa dang Honibarnü assembly nung secret ballot ajanga vote agütsüteptsü takhangba agütsü.
Osangbenertem den jembidang Paneerselvam’er camp nungi S. Semmalai-i, assembly nung nübo tashi sayuteptsü atema secret ballot ajanga lemtettsü aema Speaker dang mepishiogo, ta metetdaktsü.
Ajisüaka taoba mapang AIADMK MP, C. Palaniswamy-ibo, “Panneerselvam aser pa pusemer MLA temi odiodia motion of confidence anema vote agutsütsüla,” ta ashi.
Brihostibarnü AIADMK General Secretary, Sasikala’er camp nungi Edappadi K. Palaniswami Chief Minister atema tenangzükba agiogo.
Pa den minister 30-a tenangzükba agia liasü.
Honibarnü assembly ayongogo, kong Palaniswami den MLA 125-i nübo sayutsü.
Ano külen Panneerselvam’er camp nung MLA 10, DMK MLA 89, Congress MLA 8, Indian Union Muslim League MLA ka lir, aser menden kabo tazüng lir.
Brihostibarnü Panneerselvam camp nungi MP temi Election Commission ketdangsertem ajurua parnok dang Sasikala party General Secretary shima alibaji anentsütsü mepishia liasü.