Tanü tensa mapang nung asen lokti-liba nung telemsa adokba ya tanga kecha agi-a masü, saka aseni asen-sasa yangluba maparen agi alimaji timatemer ta angatetdi

– R. Imkong Lkr., 4th Mile Diphupar, Dimapur.

Iba lima ya mezüng ali pokli nungi kanga tang temenungratsü aketba lima ka aser tepur tajung lima ka nung asenok meimchirtem ya lia tenzük. Mezüngyongi Tsüngremi renema doktsüba Eden tsüki nungi tenzüka asen tetsü tebou Adam aser Evala nati anir takümtemji lia tenzük. Lipok 2:25. Tena dak nungi jakzükba nüburtem jenti oda alima sünga suyapokyaa rena ao. Iba mapang nungji parnok rongnung obang mapu den tenükmeremtep adoka nisungtem tsüngda nung meputepi aküm aser kati ka anema apuso. Iba jagi teyanglur Tsüngrem kanga mepelai aküm nungji alima nung temenen shidoktsü atema Noa mapang nung tzümetsüng yoka meimchirtem ajak samatsü aser alimaji khen merükteta aküm. Lipok 7:22. Iba sülen Noar rong nungi kümzükbapurtem ajanga tanaben asentenshia soyapokya liyonga ao. Lipok 9:7.
Iba sülenji-a nisungtemi pei pei sünütsü süa japujaritsü tenzük aser nisungi nisung anema apuso. Iba jagi Tsüngrem kanga mepelai aküm nungji Sodom aser Gomora nung aliba nüburtem kong Loter kibonga liasü aser Tsüngrem taochi ajanga par kibongbo mesamai anitet aser tanüngba nüburtem ajak mi agi samatsü. Lipok 19:25.
Meimchirtem ya yakta tang temenen nem mesüzüka anir odaktsür, yamaji tanüa asen lima meimchirtemi metetsümonga nisung o nisung na tsüngda nung tesendaktep yakta raksar aser yimjung melena tsükchitep adoka alima ya mashi-kushi lemangi odagi. Yangi tatishitsü ka bener arur, tanü asüng asen lanurtem ki-jemba mapang nung maparen tapu aika adoker aser itemji tembanga arur külen, iba sülenji temeshi kiyimba sentong akar, aser pastor kati ki-jemer anaji Tsüngrem tenüng nung longjemdaktsür. Iba anogo nung tenla kidang nüburtem aika adenshia alidak pastor ka ajanga Tsüngrem tenüng nung apuni akümtsü atema kulizüng agütsür. Iba anogo nung tenla kidang tetsürlar kinünger aser lar kitang kimang ajak tip kelen tesem balaka nung mena angur, yamaji teboursanger kinüngertem aser par kitang kimang ajak tip kelen tesem ka nung mentepa alir, aser shir tsütsü nübur timba aser sentsü aketer timba ta tokteper amai menteper. Yamaji telok anaji pei pei tola teku nung tu naro balala tuloka angur.
Ki-jemba anogo nungi tenzüka telok anaji lemdanger amenba jagi ki-jemer ana tsüngda nungji kala-kashi adokdaktsür, tetezü meputep adokdaktsür. Anungji tang nungibo iba yimyaji mepenshitsüla ta kü tangatetba ka lemsateper. Maneni iba temeshi ki-yimba yimya yimbong jagi pastor aser deacon-temi Tsüngrem tenüng nung kuli süa kibong kümdaktsüba tu tera pongpa pongpa mesüra züpa züpa ka kümdaktsür ta angatetdaktsüner.
Tanapuba nung sati kulizüng tembanger kelen Arogo nem adianu ana longjemba temaitsü tenla kidang pari tenla paikaji agütsür ta pastorbai mesüra deacon kati metetdaktsür aser iba yimya tu alimar yimya ama ka kümdaktsür, aser kibong lanu ana tu aka maka ta mali tangar yimya amatu benshitang, kibong ajak kasa masü karibo tangar dang akmesen mechi nung takar dang nungi sentem nung apumesar iba tenla tu abentsüsa akümer. Iba ya majung ta angajemdaktsüner.
Tasempuba nung yimtsüng nung süale, town balala nung süale tasü tamar alidang temeimertemi ali rongsen pei pei akaba nungi asükhu lemsatepertem amungdang chiyungtsü sen-o-tsü süale, jangkunü süale tera-ra bendentsüba tu lepkhu amungertem anogo pongu terok tashi mungtep dang bendena akaba ajak tu chimar. Iba sülen tu Arogo tenla kidang asü amar kibong nungi par kibong sen paikaji tenla agütsür ta metetdaktsüba tu par kidang kaa ita aliba nungi abenba masü-ja akok, ashiko oda tangarbo asü amma mapang nung tenlasa abenerji asena tenla bendi ta ser mokoksümonga abenba tenlatem alitsüa akok. Anungji iba tenla ya yimya ka ama mebenshi tajungba ta nibo shidanger, kechiyong Tsüngremi nongnanga agütsüba maginer ta Lai nung shia angur. 2 Korint tapu 9 tekong 7.