Tanü Titans o Skylark na 2nd master shield final asayatsü

Mokokchung, Mar 24 (TYO): 2nd Master Shield T20 cricket trophy mezüng semifinal yaküm runner-up Titans o Züngamedem na yangi Imkongmeren Sports Complex Mokokchung nung asayaba Titans-i 24 run-i Züngamedem madak takok tulu ngur final-i iogo.
Tanabuba semifinal yaküm champion Skylark o Vikings na tsüngda asayaba Skylark-i wicket 6 agi Vikings madak takok angu. Mar 25 Honibarnü Titans o Skylark na final anepdang 10:00 ako nungi tenzüka asayatsü. Tena ya yaküma final nung ajurutepba nung Skylark-i Titans tsükdakja parnoki 1st Master Shield marok bena lir, anungji, Titans asoshi iba asaya ya mangyangba asaya ka asütsü.
Tanü mezüng semifinal asaya nung Titans-i mezüng bat asü aser parnoki over 20 nung wicket 7 tsüker run 145 yangluteta liasü. Züngamedemi ibaji aritsü merang saka parnoki over 20 nung wicket 6 tsüker run 121 dang yanglutet.
Titans nungi batsman Longsasünepi run 46, Neehal Rai-i 34 (not out), Talikabai 29 repa liasü aser bowler rongnung Neehal Rai-i over 3 nung wicket 4 agi aser run 30 dang agütsü. Par telok nungisa Ato Changi over 3 nung wicket 3 agi aser run 14 dang agütsü aser Longsasünepia over 4 nung wicket 1 agi aser run 16 dang agütsüba ajanga par teloki Züngamedem madak takok tulu angu. Iba asaya nung Neehal Raii Man of the Match senpet angu.
Tanabuba semifinal asaya Skylark o Viking na asayaba Vikings-i mezüng bat asü aser parnoki over 20 nung wicket 5 tsüker run 118 yanglutet. Iba run-ji Skylark-i over 19.4 nung menepa parnoki Vikings pur tsükdaktsü.
Iba asaya nung Skylark nungi batsman Daniel (35), Upender (33), Chembo (23) par asemi kanga junga asayaba ajanga par telok nem takok ngutsüa final tongdaktsü. Iba asaya nung Daniel-i man of the match senpet agizük.
Iba asayamung ya Mokokchung District T20 Cricket Federation ajanga lanur cricket asayaba tsütsü ajungshitsü nükla yur taküm agi kümnabuba ayongzüka akar.