Tanü TR Zeliang-i Meluri Town Council tenzüktsütsü

Meluri, April 1 (TYO) : Phek district kübok Meluri jila nung Chief Minister T R Zeliang-i Meluri Town Council tenzüktsüba sentong asoshi kanga mazüngi mapa inyakdar.
Meluri jila ya state yimtiba nungi kilometer 167 shi pilar lir aser April 2, 2016 nü Meluri Town Council tenzükba sentong agitsü.
Yaküm November 24 nü Meluri Helipad nung helicopter ka anendang tsüok saka Chief Minister-i anir par cabinet züngsemtem timmetemi anentettsü atema blacked topped süa yangluogo.
Iba sentong nung tongti tesemdangerji CM Zeliang asütsü aser local MLA aser School Education & SCERT Minister, Yitachu-i tetushi süa jaoker ama shilem agitsü.
TR Zeliang-i nüngshilung sayatsütsü aser Executive Secretary Pochury Baptist Church Council, Rumatho-i meshiteta sarasademtsü. Sentong nung Municipal Affairs & Economics & Statistics Parliamentary Secretary, R Tohanba aser Pochury Hoho president Penthu natia o tatsütsü jembitsü.
Iba sentong nung mendenji Phek Deputy Commissioner, Murohu Chotso asütsü, Baptist Church Meluri Town Pastor, Rev Tivishe-i temoatsü meshia sarasademtsü, Vice Chairman Adhoc Town Council Meluri, Ghachu-i tesentepertem pela agizüktsü, Additional Deputy Commissioner Meluri, John Tsulise Sangtam-i anküp tepela o jembitsü aser St Xavier’s Pariah Meluri Parish Priest, Rev. Fr. Hose Lukose-i tenüngsang agüja sarasasemtsü.
Sentong nungsa Meluri Village Women Society, Karo Trakha, Kisou Khel Meluri Village aser Khubie Li Li Women Group nungertemi shilem agitsü.