Tanü Trade Union 10-i longkak aittsü

New Delhi, Sept. 01 (Agencies): Hokolbarnü Central trade unions (CTUs) 10-i sorkar anema linük tesem ajaklen longkak aitba ajanga bank, public transport aser  telecom service tem kongshitsü.
Trade Union temi onük 12 nung takhangba agütsüba sorkari mataloktsüba anema  parnoki longkak aittsü ayongzükogo aser iba nungji nisung crore 18 dak temai shilem agitsü.
Parnoki akhangba onük 12 rongnung aayangertem ita nung minimum taa sen 18,000, osettsüset nung jenjang atuba azüoktsü aser ita shia minimum pension sen 3,000 takhangbatem densema lir.
“Yaküm dang nungibo tan longkak aitba nung nisung timbai shilem agitsü, kechiyong takhangba onük 12 sorkari mataloktsüba aser aayangertem anema ozüngtem yanglushiba anema sector balala nungi aayanger nisung crore 18 dak temai longkak aittsü,” ta Trade Union Coordination Committee (TUCC) General Secy., SP Tiwari-i osangbenertem dang ashi.
Paisa, “Rong aser tayimtsü dak alia transport, telecom aser banking ama nüngdakba service tem kongshitsü. Aayangertemi hospital tem aser power plants nunga longkak aittsü, saka ibaji ajanga parnok maparenbo mekongshitsü,” ta ashi.
Coal India, GAIL, ONGC, NTPC, OIL, HAL aser BHEL ama Central public sector temia longkak aitba nung shilem agitsü, ta paisa shisem.
Ajisüaka Indian Railways aser tanga central sorkar mapa inyakertemibo shilem magitsü, kechiyong 7th Pay Commission-i benokba kübok parnok nem minimum itasen 18,000 nungi 26,000 tashi tutsütsü atema sorkari committee ka tentetogo.
Tiwari-isa, “Onoki talitabong memeshir. Onoki ita shia minimum taaji sen 18,000 atema akhanger, aser ibaji 7th Pay Commission-i benoka lir,” ta ashi.