Tanü Tsüngremmong

Asenoki ajuruba anogotem ajak tongtibang aser asenoki amongba benjongtema ajak tongtibang, ajisüaka anogotem rongnung Tsüngremmong amongba anogo aser benjongtem rongnung Tsüngremmong benjong yasa tongtibangtiba amai bilema amongtsübajisa tongtibangtiba asütsü. Asenoki benjong tapu aika amonger saka benjong tenüng nung ‘Tsüngrem’ ta jaloka amongba benjongbo Tsüngremmong ya dang lir.Iba jagi asen akhi tsüraburtemi temoatsü ajak Tsüngrem nungi arur ta meteta liasü aser temoatsü ajak agütsüsang Tsüngremji peladaktsütsübaji tongtibang ta angateta liasü. Iba tangatetba nung parnoki Tsüngrem dak amang aser Tsüngrem dak dang jenok. Atangji, parnoki amangba tsüngremji tanü asenoki külemba Yihovah Tsüngrem masütsüa akok saka par mapang nungbo temoatsü ajak agütsüsang manguba tsüngrem ka lir ta amangbajia tamang tuluka liasü ta angateter. Iba kasa tamang jenjang nung tanü asenoki Yisu Khrista dak amangra asenoki meshiba ajak moatsütsü ta Lashibai ashir. Iba tamang nung asenoki Tsüngremmong amongtsübaji kanga nüngdaka kümogo. Asenok aikati küm nung ken Christmas amongtsüba dak alaka benjongbentsü amongtsü mejangrar.Ano, Christmas amongyonga Christmas sentepia mao, mashimashi ka dang iba anogoji süidaktsür. Ajisüaka, asenok alima nung ali tashi benjong ya asenok taküm nung inyaktsüba shilem ka ta asenok ajaki angateta amongtsüla. Asenoki angatettsüba kaji benjong ya mapang endoka kazülongzüa  süidaktsüba anogo masü aser anisüngzükba anogoa masü, kechiyong benjong nungsa tebelemba belemer. Benjong ya Tsüngrem temeim aser tashi bilemtetba anogo lir. Aji oda, asen tsüraburtemi temoatsütem ajak asoshi Tsüngrem tenüng asang aser Pa nungi ano alima rongsen madak aren aser tekümzükba aginüa sarasadema Tsüngremmong among. Akhi asen tsüraburtem ajak aluyimer liasü, anungji alu nung tsüksenensüng  asütsü atema alu inyak shia parnoki Tsüngrem külema among aser item benjongtem rongnung tongtibangtiba benjongji Tsüngremmong ya lir.Tanübo asenok aikati alu mayimer. Ajisüaka, tanü putu nung asen kechi inyaker iba mapaji asen lu lir. Iba lu (mapa) nungji Tsüngremi asen memoatsüra asenok kanga timatemtsü. Aji oda, asenok kar sorkar tenzükba mapa nung alitsü, kar private mapa nung aser karbo business nung aser karbo arogo, lokti aser yimten mapa nung alitsüa akok, kechi mapa nung lidir liang, ibaji asen lu, anungji iba lu nungji Tsüngrem dang temoatsü meshia inyaktsübaji kanga tongtibang asütsü. Atangji, Tsüngremi asenok maparen aika nung moaja alitsü, anungji temeshi dang memeshii saka asenoki Tsüngrem nem tenüngsang peria agütsüra, ibajiang asenok asoshi temoatsüba asütsü. Iba tangatetba nung Tsüngremmong amongtsüla. Atangji, kija kibong , yimtsüng aser lokti balalai Tsüngremmong sentong ayongzüka amongdang Tsüngrem temoatsütem züngdanga Tsüngrem nem tenüngsang agütsütsü tim Akhidangbo Tsüngremmong ya Tsüngrem dang temoatsü meshiba among ka asütsüa akok saka tanübo asenoki Tsüngremmong ya Tsüngrem nem tenüngsang agütsübamong ka kümdaktsür mongra, ashiko ajiang tapetba aser temoatsüba asütsü. Aji oda, kija kibong aser telok balalai amongba dak alaka Aor yimkong jazüka Tsüngremmong sentong yanglur, Tsüngremi asenok nem Naga nunger ajak dang nungi tama tanüla tekümtet, kaketshisatsü aser alima rongsentem moatsüba temoatsütem züngdanga Tsüngrem nem tenüngsang peria agüja kentena, yartsüngsanga pelatepa aser sarasadema mongra, aji ngur ano asenok dang Tsüngremi koda pelala ta bilemer. Asenok shiruru  jenjang nungi nisungchi kümdaktsüba taochi den asenok rongnungi Naga nungertem rongnung yimten, arogo aser lokti lenirtem paikaya adokdaktsüba ya aser asenok mejungi liaka asenok rongnung nisung paikaya tashitemetetetr aser takar kümdaktsüba temoatsütem kong nungi arua ta bilemer ? Item temoatsütem asoshi asenoki kodangang yimjak nung telongjem ka ser Tsüngrem nem jangzü apua aser asem tema tenüngsang tulu agütsütsü ? Iba anogoji Tsüngremmong asütsüla.