Tanü UP election shilem tatembangbuba nüboyim tembanger

Lucknow, March 05 (Agencies): March 8 nü Uttar Pradesh Assembly elections shilem tatembangbuba district tenet kübok assembly menden 40 atema election agitsü, aser iba election atema Hombarnü nüboyim sentong temabngtsü.
UP nung Varanasi ya Ato kilonser, Narendra Modi indang Parliamentary constituency lir aser iba constituency nung assembly menden pongu lir.
Tawa BJP tongti lenirtem aser Union minister aikati Varanasi semdanga party candidate tem atema nübo yimtsüogo.
Iba state nung BJP, SP-Congress teloktep aser Mayawati-i aniba BSP party tem tongti ser tokteper, aser BJP-i parnoki state anüdoklen menden aika nung takok ngura züngsem 403 aliba assembly nung parnoki majority angutsü imlar.
Tang Modi Varanasi nung anenzüka lir aser pai roadshows ajanga nüboyimdar.
Yashi Varanasi yimti nung Ato kilonseri road show ajanga nüboyimba sülen state Chief Minister aser Samajwadi Party Tir, Akhilesh Yadav aser Congress lenir Rahul Gandhi natia senteper roadshow ajanga nüboyima liasü.
Maoists telungpur bulua aliba districts asem- Sonebhadra, Mirzapur aser Chandauli den Varanasi Lok Sabha constituency kübok assembly mendentemji tan election shilem nung tongti tesemtem lir, ibayongji party balalai item tesem nung rangloker inyaker.
State nung assembly election shilem tenet lemsar agir aser March 11 nü tanga state tem den külemi vote azüngtsü.
UP Election tatembangbuba shilem nung vote agütsütsüpur nisung crore 1.41 lir, aser item rongnung tetsür lakh 64.76 lir.
2012 küm state Assembly election nung item menden 40 nungi Samajwadi Party-i menden 23, BSP-i menden 5, BJP-i menden 4, Congress-i menden 3 aser tanga party temi menden 5 ngua liasü.
Bodhbarnü election agitsü aliba district tenet ji Ghazipur, Varanasi, Jaunpur, Chandauli, Mirzapur, Bhadoi aser Sonebhadra lir.
Iba shilem nung candidate ajak agi parnok 535 lir, aser item rongnung BSP candidate 40, BJP 32, SP 31, Congress 9, RLD 21 aser NCP candidate 5 lir.